Komisioni për mbrojtjen e gjyqtarëve, ku bëjnë pjesë Ministria e Brendshme, Ministria e Drejtësisë, anëtarë të Këshillit të Lartë të Gjyqtarëve, drejtuesi i Gjykatës së Posaçme Erjon Bani dhe zyrtarë të Policisë së Shtetit, ka miratuar masa shtesë mbrojtjeje për gjyqtaren Irena Gjoka. Përveç gardës me detyrë për të ruajtur gjyqtarët dhe prokurorët e SPAK, për Gjokën do të ketë edhe oficerë nga njësia e mbrojtjes së veçantë. Të dhënat e kërcënimit ndaj saj dhe indiciet për rrezikimin e saj mbahen sekret nga autoritetet, pavarësisht kërkesave për shpjegime nga Top Channel ndaj anëtarëve që ligjërisht janë të ngarkuar për ruajtjen e gjyqtarëve dhe prokurorëve.
Gjoka ka pasur më parë mbrojtje shtetërore, jo vetëm për shkak të detyrës si zv/kryetare e Gjykatës së Posaçme, por edhe si relatore e çështjeve të rëndësishme dhe të njohura publikisht, përfshirë dosjen “Partizani”. Kur ishte gjyqtare e kësaj çështjeje dhe në kulmin e akuzave, autoritetet vlerësuan se ajo ishte e rrezikuar dhe i vendosën truproja.
Komisioni raporton edhe raste të tjera të mbrojtjes shtetërore. Aktualisht gjyqtari Gentian Muça ka ruajtje të veçantë nga shteti, pasi gati pesë vjet më parë u vendos tritol në automjetin që përdorte ai dhe bashkëshortja e tij, e cila është prokurore. Po ashtu përmenden sulmet me tritol ndaj ish-gjyqtarit të Shkodrës Tonin Stërkaj, ku materiale shpërthyese u hodhën në banesën e tij dhe autorët nuk janë gjetur; pas kërcënimeve, ish-gjyqtari largoi familjen dhe, megjithëse u shkarkua nga vettingu, komisioni i KLGJ e ka vlerësuar atë si të rrezikuar.
Shumica e personave të mbrojtur nga shteti janë prokurorë të SPAK. Ndër të tjerë, përmenden tre prokurorë nga Elbasani, njëri prej të cilëve për arsye sigurie është transferuar në kryeqytet.
