Shtetet e Bashkuara publikuan tekstin zyrtar të memorandumit të mirëkuptimit me Iranin, një dokument 14-pikësh që përcakton dispozitat për rihapjen e Ngushticës së Hormuzit, lehtësimin e disa kufizimeve financiare ndaj Iranit dhe pritjet për trajtimin e programit bërthamor gjatë bisedimeve teknike. Titulli i dokumentit është “Memorandumi i Mirëkuptimit i Islamabadit midis Shteteve të Bashkuara të Amerikës dhe Republikës Islamike të Iranit”. Publikimi erdhi pas polemikave se teksti nuk ishte bërë publik më parë. Një zyrtar i lartë amerikan lexoi dokumentin dhe memorandum pritet të nënshkruhet zyrtarisht të premten, çka hap një dritare 60-ditore për negociimin e një marrëveshjeje përfundimtare.
Pikat kryesore të memorandumit:
1) Palët bien dakord për ndërprerjen e menjëhershme dhe të përhershme të operacioneve ushtarake në të gjitha frontet, përfshirë Libanin, dhe angazhohen të mos nisin luftë ose operacione kundër njëra-tjetrës; marrëveshja përfundimtare do të konfirmojë ndërprerjen e përhershme.
2) Palët respektojnë sovranitetin dhe integritetin territorial të njëra-tjetrës dhe do të përmbahen nga ndërhyrjet e brendshme.
3) Synohet arritja e marrëveshjes përfundimtare brenda 60 ditësh, me mundësi zgjatjeje me pëlqim të ndërsjellë.
4) Menjëherë pas nënshkrimit, SHBA do të fillojë heqjen e bllokadës detare dhe do ta përfundojë plotësisht brenda 30 ditësh; trafiku i anijeve do të rikthehet në përpjesëtim me nivelet para-luftës; SHBA do të largojë forcat nga afërsia brenda 30 ditësh pas marrëveshjes përfundimtare.
5) Irani do të sigurojë kalimin e sigurt të anijeve tregtare pa pagesë për 60 ditë; çminimi dhe heqja e pengesave do të fillojnë brenda 30 ditësh; Irani do të dialogojë me Omanin dhe shtetet bregdetare për administrimin e mëtejshëm.
6) Shtetet e Bashkuara dhe partnerët rajonalë do të zhvillojnë një plan për rindërtim dhe zhvillim ekonomik të Iranit me të paktën 300 miliardë dollarë; mekanizmi do të finalizohet brenda 60 ditësh.
7) SHBA angazhohen të ndërpresin të gjitha llojet e sanksioneve sipas një orari të dakorduar si pjesë e marrëveshjes përfundimtare.
8) Irani riafirmon se nuk do të zhvillojë armë bërthamore; u dakordësua një mekanizëm për asgjësimin e materialit të pasuruar nën mbikëqyrjen e IAEA-s dhe diskutime për pasurimin në kornizën për marrëveshjen përfundimtare.
9) Deri në marrëveshjen përfundimtare ruhet status quo-ja: Irani mban programin aktual bërthamor dhe SHBA nuk vendosin sanksione të reja apo forca shtesë.
10) SHBA do të lëshojë menjëherë përjashtime për eksportin dhe shërbimet e lidhura me naftën iraniane deri në heqjen e sanksioneve.
11) Fondet dhe pasuritë e ngrira të Iranit do të bëhen të disponueshme pas zbatimit; procedurat do të rregullohen reciprokisht dhe licencat do të lëshohen.
12) Do të krijohet një mekanizëm ekzekutiv për të monitoruar zbatimin dhe përputhshmërinë.
13) Pas nënshkrimit dhe në varësi të zbatimit të masave kyçe, negociatat për marrëveshjen përfundimtare do të vazhdojnë mbi çështjet e mbetura.
14) Marrëveshja përfundimtare do të miratohet nga një rezolutë detyruese e Këshillit të Sigurimit të OKB-së.
