Një automjet që lëvizte në trotuar në qytetin e Beratit, duke rrezikuar jetën dhe sigurinë e qytetarëve, u dokumentua në një video të publikuar në rrjetin social TikTok. Pas publikimit të videos, shërbimet e Policisë Rrugore të Drejtorisë Vendore të Policisë (DVP) Berat nisën veprime hetimore për identifikimin e drejtuesit të automjetit.
Në përfundim të këtyre veprimeve u identifikua drejtuesi, shtetasi I. L., i cili u shoqërua në Komisariat ku u kryen veprimet e mëtejshme procedurale. Pas kontrollit të dokumentacionit të automjetit rezultoi se ai ishte pa kontroll teknik dhe pa siguracion. Si pasojë, shtetasi I. L. u ndëshkua me masë administrative 60 000 lekë dhe iu tërhoq leja e qarkullimit.
Drejtoria Vendore e Policisë Berat falënderon qytetarët për kontributin e tyre në evidentimin e shkeljeve të rregullave të qarkullimit rrugor dhe i fton ata të vijojnë të denoncojnë çdo rast të paligjshmërisë, në numrin 112.
Lajmi u shpërnda edhe nga Top Channel.
