Ndërtesa ku lindi Adolf Hitleri në Braunau am Inn, pranë kufirit Austri-Gjermani, është rikthyer në përdorim zyrtar si stacion policie pas debatesh të gjata mbi të ardhmen e saj. Shteti austriak e bleu me detyrim pronën në 2017; më parë ajo ishte në pronësi private dhe funksiononte si qendër bamirësie për personat me aftësi të kufizuara. Dy vjet më vonë u vendos që ndërtesa të rikonstruktohej dhe të përdorej si stacion policie.
Sot, si shenjë e së kaluarës që lidhet me Hitlerin, përbri ndërtesës është vendosur një gur përkujtimor nga kampi i përqendrimit Mauthausen, me mbishkrimin “Kurrë më fashizëm”, ndërsa në fasadë është shtuar vetëm mbishkrimi “Polici”. Stefan Mltschoch, drejtues i Departamentit të Historisë në Ministrinë e Brendshme të Austrisë, deklaroi se qëllimi ishte “të shkëputej çdo lidhje me Adolf Hitlerin, në mënyrë që ndërtesa të çlirohej nga çdo simbolikë apo mit që lidhet me të”.
Autoritetet kujtojnë se gjatë regjimit nazist ndërtesa ishte shndërruar në një muze arti si pjesë e kultit të personalitetit të Hitlerit, megjithëse ai jetoi aty vetëm disa javë pas lindjes së tij në vitin 1889, para se familja të largohej. Edhe pse turistët vazhdojnë ta fotografojnë godinën, autoritetet lokale thonë se vizitat e grupeve neonaziste janë ulur ndjeshëm vitet e fundit; në Austri përshëndetja naziste dhe përdorimi i simboleve naziste janë të ndaluara me ligj.
Kryetari i bashkisë së Braunau am Inn, Johannes Weidbacher, tha se komuniteti lokal në përgjithësi e ka pranuar funksionin e ri. U shqyrtuan edhe alternativa të tjera, si përdorimi për administratë publike ose aktivitete bamirësie, por stacioni i policisë u konsiderua më i përshtatshmi.
Vendimi ka marrë edhe kritika. Komisioni Mauthausen, organizata më e madhe e të mbijetuarve të Holokaustit në Austri, kërkon që ndërtesës t’i jepet një rol më i madh në edukimin publik për krimet e nazizmit dhe paralajmëron se ndryshimi i funksionit nuk do t’i ndalojë plotësisht vizitat e neonazistëve, pasi vendlindja e Hitlerit mbetet një pikë referimi e njohur ndërkombëtarisht. Mes banorëve mendimet mbeten të ndara midis ruajtjes së funksioneve bamirëse dhe mbështetjes për shndërrimin në stacion policie.
