Sot, Shtëpia e Bardhë njoftoi zyrtarisht se presidenti i SHBA-së, Donald Trump, do të jetë i pranishëm në samitin e NATO-s që do të mbahet më 24 dhe 25 qershor në Hagë, Holandë.
Pas rikthimit në pushtet, Trump po kërkon me këmbëngulje nga vendet anëtare të NATO-s të rrisin ndjeshëm shpenzimet e tyre për mbrojtjen kombëtare.
Në një konferencë për shtyp, zëdhënësja e Shtëpisë së Bardhë, Caroline Levit, bëri me dije se së shpejti do të zhvillohet një bisedë telefonike mes presidentit Trump dhe homologut kinez, Xi Jinping. Ajo shtoi se Shtetet e Bashkuara po ndjekin me kujdes zbatimin nga Kina të marrëveshjes doganore të muajit të kaluar.
Levit theksoi gjithashtu se Trump nuk ishte informuar paraprakisht për operacionin ukrainas “Rrjeta e Merimangës”, ku Ukraina sulmoi bazat ruse në Siberi me dronë për të goditur avionët bombardues me kapacitete bërthamore.
Nga ana tjetër, presidenti Trump përgëzoi fituesin e zgjedhjeve presidenciale në Poloni, nacionalistin Karol Navroki, duke shprehur kënaqësinë për rezultatin. “Urime Poloni, ke zgjedhur një FITUES!” shkroi ai më herët në rrjetet sociale.
Ky samit pritet të sjellë diskutime të rëndësishme mbi sigurinë globale dhe bashkëpunimin midis aleatëve të NATO-s në një kohë sfidash të shumta ndërkombëtare.
