Eric Wendt, nga Kalifornia, është nominuar si Ambasador i Jashtëzakonshëm dhe Fuqiplotë i Shteteve të Bashkuara në Shqipëri. Njoftimi u bë nga Shtëpia e Bardhë, dhe nëse kalon votimin në senat, ai do të zëvendësojë ambasadoren Yuri Kim, e cila u largua në vitin 2023. Emërimi i diplomatit David J. Kostelancik për këtë post dështoi dy vite më parë për shkak të bllokimeve nga disa senatorë republikanë, duke ilustruar praktikën e zakonshme të bllokimeve politike në Uashington.
Eric Wendt ka shërbyer si oficer aktiv në Ushtrinë Amerikane që nga viti 1986 dhe që nga viti 1991 është pjesë e forcave speciale “Green Beret”. Ai ka marrë pjesë në disa misione të rëndësishme ndërkombëtare pas sulmeve të 11 shtatorit, duke përfshirë rolin e tij si drejtues ekipi për Komandën e Paqësorit të SHBA-së në Indonezi dhe në operacione ushtarake si “Liria e Qëndrueshme” në Filipine, “Liria e Irakut” dhe “Liria e Qëndrueshme” në Afganistan.
Wendt ka mbajtur pozita të rëndësishme, përfshirë atë si ndihmës ushtarak kryesor i Sekretarit amerikan të Mbrojtjes, dhe ka komanduar në të gjitha nivelet e forcave speciale. Ai flet gjuhën arabe dhe koreane dhe është vlerësuar me një sërë dekoratash ndërkombëtare dhe ushtarake, përfshirë Kryqin e Artë të Nderit të Gjermanisë për shërbimin në Afganistan, si dhe medalje nga Filipinet dhe Koreja e Jugut.
Në nëntor 2017, Wendt u emërua Koordinator i Sigurisë i Shteteve të Bashkuara për Izraelin dhe Autoritetin Palestinez, duke luajtur një rol kyç në koordinimin e çështjeve të sigurisë në rajon.
