Euroja nuk është më monedha që shqiptarët e shohin si strehën kryesore për kursimet; ndërsa monedha europiane është dobësuar ndaj lekut, kursimet po shtohen në monedhë vendase. Të dhënat e korrikut tregojnë se depozitat totale në banka arritën në rreth 1.56 trilionë lekë, rreth 20 miliardë lekë më shumë se një muaj më parë. Ndryshimi kryesor vjen te struktura sipas monedhës: depozitat në lekë arritën në 782 miliardë lekë dhe vetëm gjatë korrikut u shtuan rreth 16.1 miliardë lekë.
Zgjerimi i depozitave në lekë ka ardhur kryesisht nga depozitat pa afat, si nga bizneset, ashtu edhe nga individët. Nga ana tjetër, rritja e depozitave në valutë për muajin korrik, e shprehur në lekë, ishte shumë më e vogël, rreth 3.9 miliardë lekë më shumë se në qershor. Në terma vjetorë, depozitat në lekë u rritën me rreth 116.3 miliardë lekë, ndërsa depozitat në valutë me rreth 40.1 miliardë lekë.
Në një periudhë kur zakonisht prurjet e turizmit mund ta fuqizojnë euro-n, këtë herë leku po tërheq pjesën më të madhe të kursimeve të reja. Arsyet lidhen edhe me lëvizjen e kursit të këmbimit: euroja po këmbehet nën vlerën 90 lekë, ndërsa rreth një dekade më parë ishte rreth 140 lekë. Për qytetarin, kjo do të thotë se nëse mban kursimet në euro dhe euroja vazhdon të bjerë, në momentin e këmbimit në lekë vlera e kursimeve do të reduktohet.
Si pasojë, depozitat në lekë shënuan një rritje vjetore prej 17.5%, ndërsa depozitat në valutë u rritën me vetëm 5.4% në të njëjtën periudhë. Një forcim i vazhdueshëm i lekut duket se ka rritur besimin tek monedha vendase, dhe pritshmëritë që leku të vazhdojë të forcohet kanë nxitur zgjedhjen e kursimeve në lekë.
