Paolo Zampolli, i dërguar special i presidentit Trump për Partneritetet Globale në Ballkan, foli nga Kryegjyshata Bektashiane për marrëdhëniet Shqipëri–SHBA, bashkëpunimin dypalësh dhe për projektin për krijimin e një shteti sovran Bektashi në Tiranë. Gjatë vizitës ai zhvilloi takime me përfaqësues të komunitetit Bektash, drejtues të politikës shqiptare dhe pritet të takohet me anëtarë të qeverisë; mes kerkimeve kryesore ishin ndërtimi i një qendre të avancuar shëndetësore dhe debati rreth entitetit sovran të propozuar më parë nga Kryeministri Edi Rama.
I pyetur për idenë e shtetit Bektashi, Zampolli tha se e ka dëgjuar propozimin si nga Kryeministri ashtu edhe nga Kryegjyshi Botëror i Bektashinjve, Baba Mondi, por nënvizoi se vendimi i takon popullit shqiptar dhe komuniteti ndërkombëtar duhet ta respektojë atë. Ai u shpreh: “E kam dëgjuar Kryeministrin të flasë, kam dëgjuar Shenjtërinë e Tij të flasë. Në fund të fundit, njerëzit vendosin ose do të vendosin,” dhe shtoi se, nëse populli shqiptar e dëshiron, “kjo është një gjë e mirë”.
Në deklaratën e tij Zampolli theksoi besimin në bashkëjetesën ndërfetare dhe respektin për të gjitha objektet e kultit. Ai bëri edhe komente personale për emocionin e qëndrimit atje, duke përmendur lidhjet familjare me Vatikanin dhe faktin që vizita përsëritet në Ditën e Nënë Terezës. Zampolli shprehu vlerësim për atë që po bëhet në vend, veçanërisht në fushën e shëndetësisë, dhe potencoi rëndësinë e partneriteteve amerikane, përmendësh programin “Right to Try” dhe nevojën për spitale. Ai tha se përballet me kancer prej katër vjetësh dhe e kupton rëndësinë e shërimit të njerëzve.
Duke folur për takimet e planifikuara me katër ministra dhe përfaqësues të grupeve parlamentare, Zampolli tha se qëllimi është të tregojë respekt dhe të forcojë marrëdhëniet; ai përmendi emërimin e një ambasadori që ende nuk ka marrë postin dhe nënvizoi se Shqipëria është një mike dhe aleate e rëndësishme. Për NATO-n, ai tha se është e nevojshme, megjithëse nuk është pjesë e agjendës së tij aktive, dhe mirëpriti anëtarësimin e Shqipërisë.
