Agjencia ndërkombëtare e vlerësimit të kreditit Moody’s Ratings ka rikonfirmuar më 5 mars 2026 vlerësimin afatgjatë të kreditit sovran të Shqipërisë në nivelin “Ba3”, me perspektivë “të qëndrueshme”. Ky raport tregon për vazhdimësinë e qëndrueshmërisë ekonomike në vend, me një parashikim rritjeje të Prodhimit të Brendshëm Bruto (PBB) me 3.6% për vitin 2025 dhe 3.5% për vitin 2026.
Rritja e pritur ekonomike do të mbështetet kryesisht nga zhvillimi i sektorit të turizmit dhe fluksi i Investimeve të Huaja Direkte, veçanërisht në energji dhe turizëm. Gjithashtu, pritet një rritje e pjesëmarrjes në tregun e punës. Në aspektin fiskal, Moody’s vlerëson se buxheti i vitit 2025 do të realizohet me kujdes. Deficiti buxhetor pritet të arrijë në 1.8% të PBB-së për vitin 2025, nga 0.7% në vitin 2024, mirëpo sërish nën objektivin e qeverisë prej 2.4%.
Agjencia parashikon gjithashtu një ulje të gradual të borxhit publik, me raportin e borxhit ndaj PBB-së që pritet të bjerë në 51% në vitin 2027, nga 52.6% për vitin 2025. Kjo ulje do të jetë e ndikuar nga rritja ekonomike dhe një bilanc primar fiskal i balancuar ose lehtësisht pozitiv.
Moody’s thekson se perspektiva “e qëndrueshme” reflektón një balancë mes rreziqeve pozitive dhe negative për ekonominë shqiptare. Agjencia pret që reformat në kuadër të procesit të integrimit në Bashkimin Europian të vazhdojnë, ndonëse me një ritëm gradual. Rreziqet për likuiditetin e qeverisë dhe sektorit bankar pritet të mbeten të kontrolluara.
Rikonfirmimi i vlerësimit nga Moody’s është një tregues i rëndësishëm për stabilitetin makroekonomik të Shqipërisë dhe progresin në reformat strukturore, duke dhënë një sinjal pozitiv për investitorët ndërkombëtarë dhe për objektivin e integrimit europian të vendit.
