Autoritetet në Ushuaia kanë mohuar pretendimet se qyteti mund të jetë burimi i shpërthimit të hantavirusit në anijen turistike MV Hondius, e cila aktualisht ndodhet në Tenerife të Spanjës, ku pasagjerët po evakuohen dhe po kthehen në vendet e tyre. Anija u nis më 1 prill nga Ushuaia, qyteti më jugor i Argjentinës, dhe në bord kishte 114 pasagjerë dhe 61 anëtarë ekuipazhi nga 22 vende të ndryshme.
Dyshimet mbi origjinën e virusit nxiten nga spekulime se një turist mund të ketë u infektuar në një vendgrumbullim mbeturinash pranë qytetit, një zonë e frekuentuar për vëzhgimin e zogjve dhe ku grumbullohen brejtës. Megjithatë, drejtori i Epidemiologjisë dhe Shëndetit Mjedisor në provincën Tierra del Fuego, Juan Facundo Petrina, deklaroi se rajoni nuk ka regjistruar asnjë rast të hantavirusit që nga viti 1996, kur sëmundja u përfshi në sistemin kombëtar të raportimit. Petrina tha se Tierra del Fuego nuk ka praninë e “miut me bisht të gjatë”, brejtësit që transmeton virusin, dhe se kushtet klimatike e izolimi gjeografik i ishullit e bëjnë të pamundur përhapjen e tij në zonë.
Petrina vlerësoi se infektimi i turistit mund të ketë ndodhur gjatë periudhës 16 shkurt–13 mars, gjatë udhëtimeve në rajone të tjera të Patagonisë veriore, ku hantavirusi është i endemik. Për t’u siguruar, qeveria argjentinase ka njoftuar dërgimin e një ekipi ekspertësh në Ushuaia për të hetuar praninë e mundshme të virusit dhe për të testuar brejtësit në zonën e deponisë së mbeturinave.
Epidemiologu Eduardo López nga Spitali i Fëmijëve Ricardo Gutiérrez në Buenos Aires tha se rasti kërkon hetime të mëtejshme, duke vënë në dukje se ndryshimet klimatike dhe ekologjike mund të kenë zgjeruar habitatin e brejtësve që bartin sëmundjen.
