Policia e Korçës ka dhënë detaje mbi një konflikt të ndodhur në lagjen nr. 2 të qytetit, ku janë përfshirë disa të rinj. Sipas njoftimit zyrtar, specialistët për Hetimin e Krimeve kanë arrestuar në flagrancë shtetasin A. P., 19 vjeç, i akuzuar për “Plagosja e rëndë me dashje”, “Prishja e rendit dhe qetësisë publike” në bashkëpunim, si dhe “Prodhimi dhe mbajtja pa leje e armëve të ftohta”.
Materialet janë referuar Prokurorisë për të nisur procedimin penal ndaj shtetasit A. M., 18 vjeç, dhe tre të miturve, dy prej të cilëve janë 17 vjeç dhe një 15 vjeç. Hetimet paraprake sugjerojnë se të rinjtë janë përfshirë në një konflikt fizik, duke përdorur sende të forta për motive të dobëta. Shtetasi A. P. dyshohet se ka dëmtuar me mjet prerës 15-vjeçarin, i cili ndodhet në spital, por jashtë rrezikut për jetën.
Policia ka sekuestruar si prova materiale një automjet dhe një send të fortë (dru), që dyshohet se janë përdorur gjatë konfliktit.
