Hapësirat nëntokësore të Shën Sofisë në Stamboll, deri më tani të panjohura për publikun, po zbulojnë gradualisht elemente të reja që Turqia synon t’i hapë për vizitorë për herë të parë. Njoftimin e bëri Ministri i Kulturës dhe Turizmit, Mehmet Nuri Ersoy, teksa prezantoi progresin e punimeve të gjera të restaurimit në monumentin historik, përpara fillimit të Festivalit të Rrugës Kulturore të Antalias.
Ministri vuri në pah se hapësirat nëntokësore janë të paktën po aq interesante sa ato mbitokësore, duke nënvizuar rëndësinë e zbulimeve dhe punimeve aktuale. Ersoy përshkroi ndërhyrjet si të pashembullta në historinë moderne të monumentit dhe theksoi se ato po kryhen nën mbikëqyrje shkencore. Ai deklaroi se po kryhen “punimet më gjithëpërfshirëse të restaurimit, konservimit dhe përforcimit në historinë e Republikës” në Shën Sofi, dhe citoi vlerësimin e profesorëve në komitetin shkencor që këto punime konsiderohen ndër ndërhyrjet më gjithëpërfshirëse që nga koha e arkitektit Sinan.
Sipas ministrit, puna përfshin masa inxhinierike tejet delikate, të dizajnuara për të siguruar mbrojtjen e sigurisë dhe të strukturës origjinale të ndërtimit. Meqenëse Shën Sofia konsiderohet një trashëgimi kulturore e vlefshme, çdo hap i ndërmarrë i nënshtrohet kontrollit shkencor, tha ai, duke treguar se ruajtja e mundësive për adhurim dhe vizita është një nga objektivat kryesore ndërsa kryhen punimet.
Ersoy njoftoi se plani i hapjes së hapësirave për publikun do të ecë gradualisht: fillimisht do t’u prezantohen punimet nëntokësore gazetarëve dhe më pas do të lejohet akses i publikut, me kusht që të jenë të siguruara kushtet e duhura për vizitë dhe për ruajtjen e monumentit. Restaurimet, konzervimi dhe përforcimet vijojnë nën procedura shkencore dhe inspektime, sipas ministrit, me synimin e mbrojtjes së integritetit të Shën Sofisë ndërsa hapet për vizitorë. Top Channel.
