Numri i të vdekurve nga shembja e një ndërtese trekatëshe në Brooklyn të Nju Jorkut është rritur në dy, ndërsa të plagosurit janë 19, sipas përditësimit të autoriteteve lokale. Mes të plagosurve janë shtatë fëmijë dhe një zjarrfikës; katër persona po raportohen në gjendje kritike.
Ngjarja ndodhi të mërkurën pasdite në Flatbush Avenue. Kryetari i bashkisë së Nju Jorkut, Zoran Mamdani, konfirmoi vdekjen e të paktën dy personave dhe e përshkroi shembjen si “katastrofike”. Ai tha se ekipet e para të zjarrfikësve mbërritën në vendngjarje vetëm një minutë pas thirrjes së parë në numrin e emergjencës dhe përshkroi kushtet e operacionit si të vështira: “Ishte një situatë jashtëzakonisht e vështirë, që po zhvillohej me shpejtësi të lartë, me rrënoja të paqëndrueshme dhe boshllëqe të rrezikshme nën sipërfaqe”.
Më shumë se 250 zjarrfikës u mobilizuan për kërkimin e të mbijetuarve, me ekipe që punojnë midis rrënojave të paqëndrueshme për shkak të frikës nga një tjetër shembje. Pamjet nga helikopterët e rrjeteve televizive treguan qindra ekipe shpëtimi në vendngjarje, dhe raportohet se po përdoren sharra speciale për të prerë pjesë të rrënojave gjatë operacioneve të kërkim-shpëtimit.
Në disa pamje që qarkullojnë në internet, zjarrfikësit shfaqen duke nxjerrë një burrë nga rrënojat, duke e vendosur “në barelë” dhe duke e transportuar me shumë kujdes, duke e kaluar nga një dorë në tjetrën për ta nxjerrë në mënyrë të sigurt.
Kryetarja e Departamentit të Zjarrfikësve të Nju Jorkut (FDNY), Lillian Bonsignore, njoftoi se 19 persona kanë nevojë për ndihmë mjekësore. Ajo tha se operacioni është afatgjatë dhe se shkaqet po hetohen: “Ky është një operacion afatgjatë. Shkaqet po hetohen. Tani për tani, dhe ky numër mund të ndryshojë, kemi 19 pacientë”.
