“Isha këtu, në drejtim të kundërt me rrugën, mbaj mend që dëgjova zërin tënd”, fillon rrëfimin Donny MacKillop ndërsa kujton se si bashkëshortja e gjeti te stacioni i autobusit në Tucson të Arizonës.
“Mendova se do të më bërtisje”, kujton ai, ndërsa bashkëshortja ia kthen, “jo, nuk doja”.
Zoti MacKillop ishte nën ndikimin e drogës fentanil. Ai ishte zhdukur për gjashtë muaj.
“Përdora fentanil, sepse nuk mund të gjeja heroinë”, thotë zoti Mackillop.
Droga Fentanil është e lirë dhe fuqishme, por ndikimin e ka të shkurtër. Kjo e nxit përdoruesin që vazhdimisht të blejë më shumë. Zoti MacKillop paguante rreth një dollar për një pilulë dhe përdorte deri në 20 në ditë.
Me shumë gjasë, droga e zotit MacKillop hyri kontrabandë, në pikën kufitare ‘Nogales-Mariposa’.
Kjo pikë kufitare me Meksikën është më e afërta me shtëpinë e tij.
Pajisjet e reja në kufi skanojnë kamionët në kërkim të drogës duke përdorur rreze me energji të ulët për kabinën, ku ulet shoferi dhe energji më të lartë për rimorkion dhe ngarkesën e saj.
Ato janë vendosur këtu vitin e kaluar. Pasi shoferët nuk duhet të ndalojnë më dhe të dalin jashtë, numri i kamionëve që skanohen ka shkuar nga 100 në ditë në 700.
Oficerët në kufi më pas analizojnë imazhet nga skanimi.
Zërit të Amerikës iu dha qasje ekskluzive në dhomën e kontrollit për të parë se si qeveria e zbulon drogën.
“Ata vënë re se imazhet duket shumë më të dendura, më të errëta sesa kamioni i mëparshëm. Kjo është një anomali”, thotë Guadalupe Ramirez Drejtor i Operacioneve të Doganave dhe Mbrojtjes Kufitare në qytetin Tucson.
Një shembull i zbulimit të drogës përmes këtyre skanerave është me një kamion të mbushur me pjepër.
Hijet e rrumbullakëta janë ngarkesa e deklaruar, në këtë rast pjeprat.
“Kontrabanda është këtu”, thotë oficeri kufitar, ndërsa tregon pakot drejtkëndëshe, në dyshemenë e rimorkios, të mbushura me drogë.
Makinat e pasagjerëve kalojnë nëpër kontrolle të rregullta kufitare. Disa dërgohen për një kontroll më të detajuar.
Të tjerë kalojnë përmes skanerëve që dërgojnë imazhet te oficeri Alejandro Bachelier.
“Droga zakonisht fshihet tek panelet e dyerve dhe pas pllakës zjarrpritëse që ndan motorrin me kabinën, thotë ai.
Konfiskimet e Fentanilit janë dyfishuar çdo vit gjatë pesë viteve të fundit. Zyrtarët doganorë këtu dhe në pesë pika të tjera kufitare të Nogalesit kapën 60% të fentanilit.
Në fillim të këtij muaji, qeveria meksikane ra dakord të dërgojë 10 mijë trupa për të ndaluar fluksin e emigrantëve dhe drogës në kufi. Në shkëmbim Presidenti amerikan Donald Trump vendosi të pezullojë tarifat ndaj Meksikës.
Zoti Ramirez, nga dogana në Tucson, thotë se çmimi i drogës fentanil në rrugë është rritur.
“Kjo tregon se kërkesat për drogën vazhdojnë, por përpjekjet tona po dëmtojmë furnizimin”, thotë Drejtori i Operacioneve të Doganave dhe Mbrojtjes Kufitare në degën e qytetit Tucson.
Ish përdoruesi i Fentanilit Donny MacKillop thotë se amerikanët duhet të ndalojnë stigmatizimin e njerëzve të varur nga droga.
“Familja ende më do, mu rikthye shpresa”, thotë ai ndërsa shpreson që përfundimisht t’i ketë kaluar ditët e varësisë nga droga./VOA
