Presidenti amerikan Donald Trump deklaroi se Shtetet e Bashkuara po marrin kontrollin e Ngushticës së Hormuzit dhe se Uashingtoni do të paguhet për garantimin e sigurisë në këtë rrugë të rëndësishme detare. Në një intervistë për Fox News, Trump tha se SHBA “ndoshta do ta drejtojnë Ngushticën e Hormuzit” dhe shtoi: “Do të bëhemi roje të Ngushticës dhe do të paguhemi për ta ruajtur atë”, duke konfirmuar që “Shtetet e Bashkuara po marrin kontrollin e Ngushticës”.
Deklarata e tij vjen në një kohë kur tensionet mes SHBA-së dhe Iranit janë përshkallëzuar ndjeshëm. Sipas raportimit të Axios, forcat amerikane kanë ndërmarrë një valë të re sulmesh ndaj objektivave iraniane. Komanda Qendrore e SHBA-së (CENTCOM) njoftoi se janë goditur dhjetëra objektiva në disa zona me municione të drejtuara me precizion, me synimin për të dobësuar aftësinë e Iranit për të kryer sulme ndaj trafikut detar në Ngushticën e Hormuzit.
Operacioni amerikan u krye si kundërpërgjigje ndaj një rakete të lëshuar nga Korpusi i Gardës Revolucionare Islamike (IRGC) kundër një anijeje tregtare, si dhe si reagim ndaj kërcënimeve të Teheranit për mbylljen e Ngushticës së Hormuzit. Sulmet amerikane synonin të reduktonin kapacitetet iraniane për të kërcënuar sigurinë e lundrimit në rajon.
Në reagim ndaj këtyre sulmeve, forcat e IRGC-së kanë goditur baza ushtarake amerikane në Jordani, Kuvajt dhe Bahrein. Këto veprime të ndërsjella janë shoqëruar me rritje të tensioneve dhe, sipas raportimit, kanë shtuar frikën për një përshkallëzim të mëtejshëm të konfliktit në Lindjen e Mesme.
