Shtetet e Bashkuara paralajmëruan kompanitë e transportit detar se mund të përballen me sanksione nëse kryejnë pagesa ndaj institucioneve iraniane për sigurimin e kalimit në Ngushticën e Hormuzit. Paralajmërimi u bë nga Zyra Amerikane e Kontrollit të Aseteve të Huaja (OFAC), e cila nënvizoi se pagesat ndaj institucioneve shtetërore iraniane janë të ndaluara për personat dhe kompanitë amerikane, ndërsa edhe subjekte jo-amerikane mund të përballen me pasoja ligjore nëse përfshihen në këto transaksione.
OFAC theksoi se rreziku i sanksioneve nuk vlen vetëm për pagesat me para, por përfshin edhe forma të tjera të transferimit të vlerave, si asetet dixhitale, shkëmbimet joformale dhe donacionet. Agjencia paralajmëroi gjithashtu se do të vazhdojë të synojë sektorët kyç të ekonomisë iraniane, me fokus të veçantë në industrinë e naftës dhe petrokimikate, për të kufizuar burimet financiare që mund t’i shërbejnë vendit për të shmangur sanksionet.
Tensionet në rajon kanë sjellë një rënie dramatike të trafikut detar përmes Ngushticës së Hormuzit: nga rreth 3,000 anije në muaj që kalonin zakonisht, tani raportohet se vetëm disa anije në ditë përdorin këtë rrugë. Kjo ndryshim i zakonshëm të trafikut i atribuohet kufizimeve të vendosura nga Irani dhe një bllokade detare nga SHBA.
Irani ka deklaruar se po mbledh tarifa nga anijet për të garantuar kalim të sigurt dhe pretendon se të ardhurat nga këto pagesa janë depozituar në bankën qendrore të vendit. Nga ana e tij, Teherani ka përshkruar bllokadën amerikane si “pirateri”. Shtetet e Bashkuara, ndërkohë, argumentojnë se masat e tyre synojnë të kufizojnë të ardhurat e Iranit dhe aftësinë e tij për të shmangur sanksionet.
Lajmi u publikua nga Top Channel.
