Departamenti amerikan i Drejtësisë ka ngritur akuza penale ndaj dy ish-zyrtarëve të lartë të FBI-së, Nikki Floris dhe Bradley Benavides, të cilët dyshohen se kanë dhënë deklarata të rreme para Kongresit lidhur me hetimet mbi Hunter Biden. Dokumentet gjyqësore të publikuara më 23 tetor 2026 tregojnë se të dy akuzohen për rrenë gjatë dëshmive që dhanë para Komisionit Gjyqësor të Dhomës së Përfaqësuesve në vitin 2023. Ata janë paraqitur para gjykatës federale në Uashington pasi u dorëzuan tek autoritetet.
Sipas aktakuzës, Floris dhe Benavides deklaruan se Foreign Influence Task Force (FITF), grupi i posaçëm të FBI-së për ndikimin e huaj, nuk ishte përfshirë në hetimet që lidhen me Hunter Biden. Nikki Floris, e cila ka drejtuar këtë grup si zëvendësdrejtore të FBI-së nga mesi i vitit 2019 deri në mesin e vitit 2022, dyshohet se tha para Kongresit se nuk kishte marrë pjesë në diskutime lidhur me Hunter Biden gjatë periudhës që drejtoi njësinë. Ndërkaq, Bradley Benavides, ish-drejtues i një sektori të FITF, kishte deklaruar se kishte mësuar për ekzistencën e laptopit të Hunter Biden vetëm në vitin 2023, nga një artikull në Wikipedia.
Prokurorët thonë se këto deklarata kundërshtohen nga dokumente, komunikime të kohës dhe dëshmi të personave të tjerë, dhe se hetimet lidhen me veprimtarinë e FBI-së para zgjedhjeve presidenciale të 2020. Aktakuza përmban pretendime se deklaratat e bëra nga të dy ish-zyrtarët ishin të rreme dhe të qëllimshme.
Drejtuesja e Prokurorisë Federale në Uashington, Jeanine Ferris Pirro, u shpreh se zyrtarët që gënjejnë Kongresin duhet të mbajnë përgjegjësi, pavarësisht pozicionit që kanë pasur në institucionet shtetërore. Rasti përkon me një klimë të tensionuar politike në Shtetet e Bashkuara dhe paraqitet pak ditë përpara zgjedhjeve të mesmandatit, të planifikuara për 3 nëntor 2026.
