Shtetet e Bashkuara konfirmojnë përkushtimin ndaj pavarësisë dhe integritetit territorial të Kosovës, por vërejnë se kriza e zgjatur politike dhe vonesat në formimin e institucioneve po pengojnë avancimin e axhendës së përbashkët. Zëvendësndihmëssekretari i Shtetit, Daniel Lawton, pritet të dëshmojë para Kongresit, ku do të nënvizojë se zgjedhjet e përsëritura dhe periudhat e gjata me qeveri në detyrë kanë penguar përparimin e prioriteteve të përbashkëta. Washingtoni i ka bërë thirrje Prishtinës që të përmbyllë formimin e institucioneve në përputhje me Kushtetutën dhe vendimet e gjykatave.
SHBA shprehin shqetësim për situatën e komunitetit serb në Kosovë dhe kërkojnë të drejta dhe mbrojtje të barabartë për të gjithë qytetarët. Theksohet rëndësia e KFOR-it për sigurinë dhe stabilitetin e vendit. Sipas Lawtonit, dialogu ndërmjet Kosovës dhe Serbisë, i ndërmjetësuar nga Bashkimi Evropian, ka ngecur për shkak të mungesës së vullnetit politik nga të dyja palët. SHBA i bëjnë thirrje Prishtinës dhe Beogradit të shmangin provokimet, të përmbushin zotimet dhe t’u rikthehen bisedimeve pa parakushte.
Në të njëjtën kohë, Uashingtoni po forcon partneritetin me Serbinë përmes bashkëpunimit në fushat e energjisë, mbrojtjes, sigurisë dhe ekonomisë. Politika amerikane në Ballkanin Perëndimor mbështetet në tri prioritete kryesore: stabilitetin, interesat ekonomike dhe tregtare, si dhe luftimin e kërcënimeve të sigurisë. Në këtë kuadër, SHBA kërkon që vendet e rajonit të fokusohen te zgjidhjet lokale, zhvillimi ekonomik dhe forcimi i kapaciteteve të mbrojtjes, ndërsa aleatët e NATO-s pritet të rrisin shpenzimet për sigurinë.
Për Shqipërinë, Bosnje e Hercegovinën, Maqedoninë e Veriut dhe Malin e Zi, Uashingtoni thekson bashkëpunimin në energji, mbrojtje, siguri dhe ekonomi. Mesazhi amerikan për Ballkanin është që fokusi të jetë te stabiliteti dhe zhvillimi, ndërsa SHBA do të vijojë angazhimin në rajon përmes partneriteteve ekonomike dhe të sigurisë.
