Forcat e armatosura të SHBA-së po përgatisin plane emergjente për të goditur mbrojtjen e Iranit në Ngushticën e Hormuzit nëse dështon armëpushimi, raporton CNN duke iu referuar zyrtarëve amerikanë. Sipas burimeve, fokusi aktual është neutralizimi i minave iraniane, i mjeteve të sulmit të shpejtë dhe i kërcënimeve bregdetare, me qëllim mbajtjen të hapur të kësaj rruge detare përmes së cilës kalon rreth 20% e naftës botërore. Një zyrtar i Pentagonit tha se forcat amerikane vazhdojnë t’i paraqesin opsione Presidentit Trump dhe se “të gjitha mundësitë mbeten në tryezë”.
Presidenti Trump ka insistuar se Shtetet e Bashkuara kanë kontroll të plotë mbi Ngushticën. Në një postim në Truth Social, ai deklaroi se “asnjë anije nuk mund të hyjë apo të dalë nga zona pa miratimin e Marinës Amerikane”, derisa Irani të arrijë një marrëveshje. Ai po ashtu theksoi se nuk ka ndërmend të përdorë armë bërthamore kundër regjimit të ajatollahëve: “Nuk kemi nevojë për to. Pse duhet të përdor armë bërthamore kur ne tashmë e kemi dobësuar Iranin me mënyra konvencionale? Nuk do ta bëja. Askush nuk duhet të lejohet të përdorë armë bërthamore,” citohen fjalët e tij.
Pak orë pas njoftimit të Trump për zgjatjen me tri javë të pushimzjarrit mes Izraelit dhe Libanit, ambasadori izraelit në OKB, Danny Danon, e vlerësoi situatën si “dukshëm më të mirë” krahasuar me periudhën para ndalimit të pjesshëm të luftimeve, por shtoi se armëpushimi “nuk është 100% i plotë”. Danon paralajmëroi se Izraeli do të përgjigjet ndaj çdo sulmi nga Hezbollahu dhe vuri në dukje se çështja kryesore mbetet nëse qeveria libaneze do të jetë në gjendje të zbatojë armëpushimin dhe të ushtrojë plotësisht sovranitetin në jug të vendit.
Zona në jug të Libanit nga muaji i kaluar është pjesërisht e kontrolluar nga Forcat e Mbrojtjes së Izraelit gjatë një ofensive kundër milicive të Hezbollahu. Disa zyrtarë izraelitë kanë përmendur mundësinë e mbajtjes së një pranie ushtarake të përhershme në një pjesë të madhe të Libanit jugor, në jug të lumit Litani.
