Një ish-gjeneral sirian, i kërkuar për krime kundër njerëzimit dhe i lidhur me programin e armëve kimike të Sirisë, Bassam al-Hassan, po strehohet dhe financohet në Liban me mbështetjen e autoriteteve amerikane dhe libaneze, sipas hetimit të BBC-së dhe transmetuesit amerikan NPR. Hassan, ish-këshilltar i lartë i presidentit Bashar al-Assad, thuhet se u vendos në Liban pas rënies së regjimit të Assadit në vitin 2024.
Sipas dokumenteve dhe burimeve të BBC-së, ai është lejuar të qëndrojë në Liban në kuadër të një marrëveshjeje që përfshin FBI-në dhe agjenci të tjera amerikane dhe libaneze, në shkëmbim të informacionit, kryesisht për rastin e zhdukjes së gazetarit amerikan Austin Tice, i rrëmbyer në Siri në 2012. BBC raportoi më parë se rrëmbimi i Tice ishte planifikuar dhe se Hassan ishte pjesë e zinxhirit komandues.
Gjatë një takimi midis Hassan, përfaqësuesve të FBI-së dhe CIA-s dhe zyrtarëve libanezë, atij iu ofruan “rezidencë”, “mbrojtje” dhe ndihmë për nevojat e jetesës në këmbim të informacionit. Burime thanë se ai merr pagesa nga autoritetet amerikane përmes një ndërmjetësi, duke e vështirësuar gjurmimin e transfertave. Hassan është gjithashtu nën sanksione të Shteteve të Bashkuara.
Hassan ka deklaruar para hetuesve amerikanë se Austin Tice u ekzekutua me urdhër të Bashar al-Assad, por disa persona të njohur me hetimin kanë vënë në dyshim detajet e dëshmisë së tij. Ai ka treguar një vend të mundshëm ku mund të jenë eshtrat e Tice, por kërkimet në atë zonë nuk sollën rezultate; dy burime thanë se autoritetet amerikane ndërprenë gërmimet para përfundimit, ndoshta për arsye sigurie.
Zyrtarë nga dy institucione të qeverisë së re siriane i kanë thënë BBC-së se duan kthimin e Hassanit në Siri për t’u përballur me drejtësinë, ndërsa autoritetet amerikane kërkojnë që ai të qëndrojë në Liban. BBC kërkoi koment nga FBI-ja, CIA-ja dhe Drejtoria e Përgjithshme e Sigurisë së Libanit; vetëm FBI-ja u përgjigj, duke refuzuar të komentojë konkretisht dhe duke u rikthyer te fokusi për zbardhjen e fatit të Tice dhe sigurimin e kthimit të tij.
Hetimi i BBC-së tregon gjithashtu se Hassan nuk është i vetmi ish-zyrtar i regjimit që dyshohet se ka përfituar pagesa ose ndihmë për të jetuar jashtë vendit; disa persona të tjerë të lidhur me rrëmbimin e Tice besohet se ndodhen në Liban ose në Emiratet e Bashkuara Arabe. Austin Tice, ish-marins amerikan dhe gazetar i pavarur, u rrëmbye në Damask në gusht 2012 dhe fati i tij mbetet i panjohur.
