Partizani do të përballet nesër në orën 19:00 me Bylisin në “Arenën e Demave”. Trajneri Oltijon Kërnaja theksoi se prioritet është fitorja për të vijuar objektivin e klubit, duke shtuar se skuadra e ka arritur me shumë luftë vendin ku ndodhet dhe duhet ta ruajë atë.
Për kundërshtarin, Kërnaja e vlerësoi Bylisin si ekip shumë të fortë, duke përmendur paraqitjen e tij kundër Dinamo City si tregues. Ai rikujtoi ngjarjet e sezonit të kaluar kur Bylis fitoi 3-2 pas epërsie 2-0 të Partizanit, dhe paralajmëroi se përballja do të jetë e vështirë. Sipas tij, është e nevojshme që skuadra të japë maksimumin sepse duhen tri pikët.
Në lidhje me çështjen e gjykimit, Kërnaja tha se do të vlerësohet në fund të sezonit nëse ka pasur deformim të garës, dhe përmendi se ndeshja e Kupës ndaj Elbasanit kishte ndikuar rezultatin e kualifikimit. Ai shtoi se këto çështje do t’i lënë për institucione të tjera dhe se aktualisht fokusi është te ndeshja me Bylisin.
Për sulmuesin Sidibe, trajneri tha se ngërçe shënuese ndodhin edhe te lojtarët më të mëdhenj dhe se Sidibe ka pasur raste optimale, përfshirë një kundër një me portierin në ndeshjet me Vllazninë dhe Elbasanin. Ekipi do të ndihmojë lojtarin që të rikthehet te goli, pasi golat e tij dhe të të tjerëve janë të rëndësishëm për përmirësimin e rezultateve.
Mungesat u shpjeguan si profile të ndryshme që nuk mund të krahasohen me Skukën. Contreras dhe Toma janë të rinj që kanë bërë mirë; Toma erdhi si zgjedhje e katërt në sulm në fund të gushtit, ndërsa Contreras ka bërë mirë me Partizanin B. Të dy kanë shënuar nga 6 gola këtë sezon. Kërnaja theksoi se ngërçet psikologjike në shënim i kanë pasur edhe lojtarë të tjerë si Isgandarli, Human, Bytyçi dhe Sembene në situata standarde.
Rikthimet, sipas tij, janë shumë të rëndësishme; Preka konsiderohet boshti i ekipit bashkë me Skukën dhe rikthimi i tij ndihmon edhe harmoninë në dhomat e zhveshjes. Fadairo jep mundësi variacioni në manovrën sulmuese. Msrku, Çipi, Sula dhe Martinez kanë humbur sezonin. Për tifozët, Kërnaja kërkoi falje për rezultatet e fundit dhe premtoi se skuadra do të japë maksimumin, do të luftojë dhe do të luajë për fitore dhe për të argëtuar tifozët.
