Seanca maratonë e së enjtes u shoqërua me tensione edhe në orët e vona të mbrëmjes. Nënkryetari i Partisë Demokratike, Luçiano Boçi, u përjashtua nga seanca pasi bllokoi foltoren dhe gardia intervenoi. Pas disa vërejtjeve, kryetari i Kuvendit, Niko Peleshi, vendosi përjashtimin. Pas një ndërprerjeje të shkurtër, seanca rifilloi në kaos, pasi Boçi nuk zbatoi vendimin për t’u larguar nga salla. Opozita protestoi në grup dhe u largua nga seanca kur Peleshi nuk tërhoqi vendimin për përjashtimin e tij.
Diskutimet për rendin e ditës vazhduan vetëm me përfaqësuesit e mazhorancës, të cilët me votat e tyre miratuan të gjitha projektligjet e propozuara nga socialistët. Me propozim të kreut të grupit parlamentar socialist, Taulant Balla, projektligji i propozuar nga opozita për taksat kombëtare, që synonte uljen e çmimit të naftës, u shty për në seancën e radhës.
Në mungesë të deputetëve opozitarë, mazhoranca miratoi me 76 vota pro dhe asnjë kundër projektligjin për krijimin e Agjencisë së Arsimit. Kuvendi miratoi gjithashtu me 77 vota pro në tërësi projektligjin “Për disa shtesa dhe ndryshime në ligjin nr. 33, datë 31.03.2021, ‘Për Gardën e Republikës së Shqipërisë’, i ndryshuar”.
Me këto ndryshime ligjore, mazhoranca synon të rikthejë formulën e mëparshme të emërimit të drejtuesve të Gardës së Republikës, duke hequr procesin e konkurrimit dhe duke parashikuar emërim të drejtpërdrejtë nga Kryeministri, me propozim të ministrit të Brendshëm.
Pas rreth 12 orësh diskutimesh dhe debate, seanca plenare u mbyll me një minutë heshtje në nder të akademikut Rexhep Qosja, i cili u nda nga jeta në moshën 89-vjeçare.
