Firmat ligjore Kasowitz dhe Mishcon de Reya dorëzuan një letër zyrtare nga kryebashkiaku i Tiranës, Erion Veliaj, për përfaqësuesit e ambasadave dhe organizatave ndërkombëtare në Shqipëri, duke i ftuar të monitorojnë seancën e 8 majit para Gjykatës Administrative në Tiranë dhe të kërkojnë që procedura të transmetohet drejtpërdrejt, sipas praktikave të transparencës së Gjykatës Kushtetuese.
Seanca do të shqyrtojë ligjshmërinë e emërimit të Ols Dado si prokuror në çështjen penale kundër Veliajt. Në letrën e tij, Veliaj parashtroi një kontestim ligjor që pretendon se Dado nuk ka përmbushur kërkesat e detyrueshme të kualifikimit, konkretisht përfundimin e Shkollës së Magjistraturës apo marrjen e një përjashtimi të ligjshëm, dhe se për pasojë emërimi dhe veprimet e tij si prokuror janë të pavlefshme që nga fillimi.
Veliaj paralajmëron mundësinë që çështja të hidhet poshtë për arsye procedurale të “legjitimitit” pa u shqyrtuar meritat, dhe të zhvillohet në një mjedis të mbyllur, larg vëmendjes publike dhe ndërkombëtare. Ai shkruan se një rezultat i tillë do të ngrejë shqetësime mbi procedurat ligjore dhe sundimin e ligjit. Në letrë përmenden edhe “pasojat e emërimit të një prokurori të pakualifikuar si z. Dado, duke përfshirë paraburgimin e pacaktuar, aksesin e kufizuar te avokati dhe provat, dhe masat hetimore tepër të zgjeruara që prekin familjen dhe jetën personale të Veliajt”.
Kryebashkiaku kërkon nga përfaqësuesit ndërkombëtarë të marrin pjesë në seancë, të monitorojnë procedurat dhe të amplifikojnë çështjen në nivele ndërkombëtare. Në letrën e dërguar nga zyrat ligjore, theksohet kërkesa për transparencë dhe për një shqyrtim që të mos shmangë meritat e kontestimit.
Dan Fetterman, partner në Kasowitz, shton: “Kjo është një çështje themelore e sundimit të ligjit. Nëse një prokuror nuk ka kualifikimet ligjore për të mbajtur detyrën, çdo veprim i ndërmarrë nën atë autoritet është në thelb i dyshimtë. Transparenca në këtë procedurë është thelbësore jo vetëm për të drejtat e Kryetarit Veliaj, por edhe për besimin e publikut në institucionet gjyqësore të Shqipërisë.”
