Tirana është gati të mikpresë samitin e katërt të diasporës me moton “Përmes rrënjëve lartësohemi”. Gjatë tre ditëve, shqiptarë nga e gjithë bota do të diskutojnë kontributin e tyre në atdhe. Ferit Hoxha, ministër për Europën dhe Punët e Jashtme, e përshkruan samitin si “një kuvend për të kthyer lidhjet në veprim dhe potencial në rezultate konkrete për Shqipërinë 2030”.
Hapja e samitit do të ndodhi mbrëmjen e kësaj të hëne, me dekorimin e personaliteteve të diasporës nga Presidenti Bajram Begaj. Dita e dytë do të fillojë me fjalët përshëndetëse të Ferit Hoxhës dhe kryeministrit Edi Rama. Tema e parë do të jetë “Diaspora dhe demokracia përfaqësuese në hapësirën shqiptare: nga vota te përfaqësimi institucional”, e organizuar nën kujdesin e Kuvendit të Shqipërisë.
Panelet e tjera do të shqyrtojnë rolin e diasporës në inovacion dhe shëndetësi, si dhe rëndësinë e gjuhës shqipe përmes panelit “Standardizimi dhe certifikimi i gjuhës shqipe në diasporë”. Në ditën e tretë, do të diskutohet ndihma që diaspora mund të ofrojë për avancimin e Shqipërisë drejt anëtarësimit në Bashkimin Europian, në tryezën me temë “Diaspora shqiptare si partner mbështetës për integrimin evropian dhe zhvillimin e qëndrueshëm”.
