Nismëtarët e quajtën këtë lëvizje “revolucioni Flamingo”, duke marrë si simbol shpendin e rikthyer në Lagunën e Zvërnecit. Ata shprehën shqetësimin se investimi prej 4 miliardë dollarësh do të dëmtojë zonën e mbrojtur. Qytetarë të shumtë u bashkuan në protesta disa ditë me radhë dhe shfaqën qëndrime të ndryshme: disa thanë se janë pro investimeve, por kërkojnë ruajtjen e zonave të mbrojtura si pasuri të çmuar të Shqipërisë. “Jemi dakord që të bëhen investime, por jo në atë zonë. Ajo zonë është mrekulli, nuk duhet prekur”, u shpreh një qytetar.
Flamingoja u vendos si motiv kryesor i protestës, por shumë nga pjesëmarrësit, edhe pse ndodheshin në shesh për më shumë se tri javë, nuk njihnin detajet e pankartave, habitatet ku rriten këto specie apo pasojat që mund të ketë ndërhyrja në ekosistem. Disa protestues pranuan hapur mungesën e informacionit: “Nuk kam qenë ndonjëherë dhe nuk e di çfarë gjallesash janë aty. Qëllimi im që jam në protestës është vetëm largimi i qeveritarëve”, tha një tjetër. Të tjerë ishin edhe më të përgjithshëm: “Nuk e di, nuk kam qënë ndonjëherë. Nuk më interesojnë ato punë”.
Në ditën e 21-të, në mbështetje të protestuesve, erdhën edhe shqiptarë nga Kosova, Maqedonia e Veriut dhe diaspora. Disa prej tyre thanë se Zvërnecin e kishin vizituar vetëm si turistë për disa ditë: “Kam qenë vetëm si turist, një ditë dhe jam kthyer”, deklaroi një qytetar, ndërsa një tjetër tha: “Nuk e di unë çfarë ka, unë jam kosovar me origjinë”.
Gjatë fjalimeve përpara Kryeministrisë, qytetarët përsëritën rëndësinë e zonave të mbrojtura, ekosistemit dhe specieve të rralla që rriten aty. Megjithatë, disa protestues pranuan se nuk janë të informuar për ndikimin konkret të investimeve te flamingot dhe ekosistemi i zonës: “Nuk kam qenë ndonjëherë në Zvërnec, nuk e di sa larg ndodhet nga Vlora”, tha një qytetar; “Nuk e kam idenë, nuk e kam shkelur atë zonë”, tha një tjetër. Disa shprehën që shqetësimet e tyre ishin më të gjera: “S’ka lidhje me flamingot, këtu nuk kanë bukë të hanë”, deklaroi një qytetar. Të tjerë mbështesin nismëtarët, por thanë se flamingot shërbejnë si justifikim, ndërsa arsyet e pjesëmarrjes janë çështje të qeverisjes, shëndetësisë, arsimit dhe largimit të të rinjve nga vendi.
