Rusia ka vendosur kufizime të pjesshme ndaj aplikacioneve të njohura të mesazheve, si WhatsApp dhe Telegram, duke i akuzuar ata për dështimin në ndarjen e informacionit me autoritetet. Këto përplasje mes Moskës dhe platformave të huaja teknologjike janë intensifikuar pas pushtimit të Ukrainës në 2022, me kritikët që argumentojnë se Rusia e përdor këtë konflikt për të zgjeruar kontrollin mbi internetin dhe për të kufizuar liritë dixhitale.
Presidenti Vladimir Putin ka autorizuar zhvillimin e një aplikacioni të ri mesazhesh, i mbështetur nga shteti, që synon të promovojë platformat vendase dhe të reduktojë varësinë nga teknologjitë e huaja. Roskomnadzor, rregullatori rus i komunikimeve, ka bërë të ditur se po ndërmerren masa për të kufizuar thirrjet në këto mesazherë. Sidoqoftë, ata theksuan se nuk ka kufizime të tjera për funksionalitetin e aplikacioneve.
Ministria e Zhvillimit Dixhital theksoi se qasja në thirrjet do të rikthehet vetëm në rast se platformat fillojnë të zbatojnë legjislacionin rus. Meta, pronarja e WhatsApp, ka reaguar duke theksuar se platforma ofron komunikim të sigurt dhe se Rusia po përpiqet ta bllokojë atë për më shumë se 100 milionë rusë. Nga ana tjetër, Telegram ka shkruar se lufton aktivisht keqpërdorimin e platformës dhe heq përmbajtje të dëmshme çdo ditë.
Sipas raportimeve, thirrjet zanore në Telegram janë pothuajse jasht funksionit dhe WhatsApp po raporton probleme serioze. Ministria ruse akuzoi të dy aplikacionet për neglizhencë dhe për lehtësimin e mashtrimeve financiare dhe aktivitetit terrorist. Anton Gorelkin, nënkryetar në Dumën Ruse, ka kërkuar për hapjen e entiteteve ligjore në Rusi nga këto platformat, duke paralajmëruar se masat kufizuese do të vazhdojnë nëse nuk ndodhin ndryshime.
Shtimi i kontrollit teknologjik nga Rusia dhe zhvillimi i aplikacionit të ri shtetëror kanë ngritur shqetësime për mbikëqyrje të gjerë. Një raport i Human Rights Watch ka theksuar se qeveria ruse po rrit kontrollin mbi infrastrukturën e internetit, duke bllokuar faqe dhe kufizuar mjete të anashkalimit të censurës. Këto veprime shihen si tentativë për të shtypur lirinë e fjalës dhe për të prezantuar një model të ri të survejimit dixhital në emër të sigurisë kombëtare.
