Sekretari i Shtetit i SHBA-së, Marco Rubio, deklaroi se Irani nuk do të ketë të drejtë të vendosë taksa në Ngushticën e Hormuzit si pjesë e ndonjë marrëveshjeje përfundimtare me SHBA-në, duke argumentuar se një rregullore e tillë do të shkelte ligjin ndërkombëtar. “Kjo është një korsi ndërkombëtare detare. Asnjë vend nuk lejohet të vendosë taksa ose tarifa në një korsi ndërkombëtare detare”, u shpreh ai, dhe shtoi se besonte se “të gjitha vendet në këtë rajon do të pajtoheshin me ne”.
Rubio mbërriti të martën në Abu Dhabi, ndalesa e parë e një turneu në vendet e Gjirit që synon të qetësojë aleatët e SHBA-së, të cilët janë goditur nga raketat dhe dronët iranianë gjatë luftës me Iranin dhe e kanë kundërshtuar këtë sjellje. Me mbërritjen e tij ai konfirmoi se protokolli i marrëveshjes me Iranin do të jetë temë diskutimi në bisedime. “Kjo me siguri do të diskutohet gjatë këtyre bisedimeve”, u tha ai gazetarëve, kur u pyet nëse do të përpiqej të qetësonte aleatët e Gjirit.
Rubio pohoi se disa pika që nuk përfshihen në memorandum mund të diskutohen dhe se vetë memorandumi do të duhet të shqyrtohet: “Disa pika që nuk janë në memorandumin e mirëkuptimit padyshim do të diskutohen, por vetë memorandumi me siguri do të duhet të shqyrtohet”. Ai theksoi gjithashtu se një lexim i kujdesshëm i memorandumit tregon se një ndërprerje e plotë dhe përfundimtare e armiqësive në të gjithë rajonin nuk është e mundur përderisa përfaqësuesit e Iranit vazhdojnë të lëshojnë raketa dhe dronë nga Iraku dhe të përfshihen në akte terroriste, “siç kanë bërë Hamasi dhe Hezbollahu”.
Në kuadër të vizitës, sekretari amerikan do të takohet me autoritetet e Emirateve të Mërkurën, para se të udhëtojë për në Kuvajt dhe më pas për në Bahrein, ku do të marrë pjesë në takimin e Këshillit të Bashkëpunimit të Gjirit të enjten.
