Sekretari amerikan i Shtetit Marco Rubio deklaroi në margjinat e Asamblesë së Përgjithshme të OKB-së në Nju Jork se Serbia është e përfshirë në “çështje potencialisht problematike dhe shpërthyese”, pa shpjeguar më tej për cilat çështje bëhej fjalë. Ai theksoi se SHBA-ja ka një partneritet strategjik me Beogradin dhe dëshiron ta thellojë këtë marrëdhënie, por deklarata e tij e fortë ngriti dyshime, sidomos në një kontekst ku vijnë njoftime se Europa po shqyrton plane emergjente pas provokimeve ruse dhe paralajmërimeve për një sulm të mundshëm.
Presidenti i Letonisë, Edgars Rinkevics, shprehu mosmarrëveshje me raportimet e përsëritura se Rusia mund të sulmojë NATO-n ose Bashkimin Evropian në muajt e ardhshëm me qëllim dobësimin e mbështetjes për Ukrainën, duke thënë se një proces i tillë tashmë ka filluar. “Ne nuk po flasim për një luftë konvencionale. Po flasim për të gjitha llojet e provokimeve, të gjitha llojet e akteve të sabotimit, të gjitha llojet e testimeve dhe, padyshim, kjo është diçka që po ndodh derisa ne po flasim”, deklaroi Rinkevics për Radion Europa e Lirë.
Sipas raportimeve, zyrtarë të inteligjencës evropiane, CIA-ja, si dhe figura politike si presidenti francez Emmanuel Macron dhe kryeministri polak Donald Tusk, kanë paralajmëruar ditët e fundit se Moska mund të shkojë deri aty sa të kryejë një sulm ajror, në një formë apo tjetër, ndaj territorit të NATO-s në muajt e ardhshëm. Qasja e tillë do të ishte për të provuar se zotimi i aleancës për mbrojtje të përbashkët nën Nenin 5 është vetëm disa fjalë në letër, sipas asaj që raporton Radio Europa e Lirë.
Në muajt e fundit janë regjistruar incidente që u janë atribuuar Rusisë, duke përfshirë zjarrvënie, plane për atentate dhe akte sabotimi të infrastrukturës, si dëmtim i hekurudhave dhe ndërhyrje elektronike. Lajmi raportohet nga Top Channel, duke cituar burime ndërkombëtare dhe deklaratat e zyrtarëve të përmendur më sipër.
