Policia spanjolle goditi një prej rrjeteve më të mëdha kriminale të trafikimit të emigrantëve në Mesdhe, duke arrestuar 78 persona gjatë një operacioni që përfshiu edhe ndalimin e katër drejtuesve të dyshuar të organizatës. Si pjesë e aksionit u sekuestruan 18 skafe me shpejtësi të lartë, të cilat hetimet thonë se ishin përdorur për të kryer të paktën 64 operacione trafiku drejt brigjeve spanjolle dhe ishullit të Ibizës.
Sipas hetimeve, rrjeti ka transportuar në mënyrë të paligjshme më shumë se 2,000 emigrantë. Emigrantëve u kërkoheshin deri në 12,000 euro për udhëtim, ndërsa në çdo skaf mund të vendoseshin deri në 50 persona, gjë që rritte rrezikun për jetën e tyre. Policia vlerësoi se fitimet e siguruara nga këto veprimtari kapin mbi 24 milionë euro. Të njëjtat mjete lundruese, sipas akuzave, përdroheshin gjithashtu për trafikimin e drogave sintetike, përfshirë ekstazinë.
Kalimet që organizonte rrjeti kryheshin në kushte jashtëzakonisht të rrezikshme: me shpejtësi të larta dhe në det të trazuar. Raportohet se, në disa raste, emigrantët lidheshin gjatë udhëtimit për të mos rënë në ujë, një praktikë që pasqyron rreziqet e larta humane të këtyre operacioneve. Skafet e sekuestruara vlerësohen në më shumë se pesë milionë euro.
Operacioni u zhvillua në bashkëpunim me Europolin dhe forcat e rendit të Francës, Portugalisë dhe Polonisë, ndërsa bastisjet dhe arrestimet u kryen në kuadër të hetimeve që synojnë shkatërrimin e rrjeteve transnacionale të trafikut të njerëzve dhe aktivitetit të tyre kriminal të lidhur me drogën. Hetimet vijojnë për të identifikuar plotësisht strukturën e organizatës, rrjedhën e parave dhe bashkëpunëtorët e mundshëm në vendet e përfshira në këtë trafik.
