Pas publikimit të videove të saj intime në rrjetet sociale dhe bujës së madhe në opinion, këngëtarja Eli Fara ka reaguar publikisht. Ajo shpreh se nuk ndihet e turpëruar dhe se ashtu duhet të ndihen ata që i shpërndanë dhe publikuan pamjet. Në reagimin e saj, Fara shkruan: “Po përjetoj një dhimbje që nuk ia uroj asnjë gruaje: cenimin e privatësisë dhe përballjen me gjykime e fyerje që prekin edhe familjen time”.
Artistja ngre shqetësimin për mënyrën sesi gratë përballen me gjykimet e shoqërisë, duke theksuar se shpesh u kërkohet të mbajnë mbi supe edhe turpin e veprimeve që kryhen kundër tyre. Ajo shprehet se gratë u përballen me dyfishim të dhimbjes: fillimisht u cenohen privatësia dhe pastaj u kërkohet llogari për atë që ka ndodhur. Sipas saj, ato “i lëndojnë dhe pastaj i gjykojnë për mënyrën si e përballojnë dhimbjen”. Në këtë kontekst, Fara thekson qartë se “Asnjë grua nuk duhet të kalojë nëpër këtë poshtërim”.
Më tej, këngëtarja thotë se çështjen do ta çojë për zgjidhje nëpërmjet institucionit të drejtësisë, pa dhënë detaje të tjera për veprimet konkrete. Ajo i bën thirrje publikut për “njerëzillëk” dhe kërkon ndalimin e shpërndarjes së materialeve që mund të thellojnë dhimbjen e një personi dhe familjes së tij, duke nxjerrë në pah nevojën për empati: “Përpara çdo gjykimi, mendoni për njeriun dhe familjen që po lëndoni”.
Në fund të reagimit, Eli Fara falënderon familjen, miqtë, kolegët dhe të gjithë ata që e kanë mbështetur publikisht apo privatisht. Ajo shpreh se dashuria dhe mirëkuptimi i tyre i japin forcë për të vijuar përpara “me dinjitet dhe me kokën lart”. Përmbajtja e reagimit është bërë publike pas ngjarjes që shkaktoi reagim të gjerë në opinion. Top Channel
