Pas mbytjes së një fëmije 7-vjeçar në ujërat e Drinit të Zi, autoritetet në Dibër shprehën shqetësim për rrezikun nga ndryshimet e menjëhershme të prurjeve të lumit, sidomos pas hapjes së portave të digave në territorin e Maqedonisë së Veriut. Nën drejtimin e Prefektit të Qarkut Dibër, Nexhbedin Shehu, u mbledh Task-Forca me synim forcimin e masave të sigurisë dhe parandalimin e tragjedive të tjera përgjatë rrjedhës së Drinit të Zi.
Në takim u kërkua veçanërisht njoftim paraprak nga pala maqedonase për oraret e hapjes së portave të digës së Spiljes në Dibër të Madhe, që informacioni të përcillet në kohë dhe strukturat shqiptare dhe banorët e zonave përgjatë lumit të kenë mundësi të marrin masat e nevojshme. U propozua edhe që operatorët privatë që veprojnë përgjatë Drinit të Zi të bëjnë publike oraret e hapjes së portave dhe çdo problematikë që lidhet me rrjedhën e lumit, në mënyrë që informacioni të jetë i aksesueshëm për të gjithë.
Si masa praktike për të rritur gatishmërinë, u kërkua trajnimi dhe shtimi i personelit të reparteve zjarrfikëse në bashkitë Dibër dhe Bulqizë për t’u përgjigjur më shpejt emergjencave në ujë. Një tjetër propozim ishte vendosja e tabelave informuese dhe paralajmëruese në akset kryesore që çojnë drejt lumit, për të informuar qytetarët dhe turistët për rrezikun e ndryshimeve të papritura të nivelit dhe rrjedhës së ujit.
Shqetësimi u theksua edhe nga rritja e turizmit në zonë; sipas të dhënave të paraqitura në takim, numri i vizitorëve pranë Drinit të Zi këtë vit është rritur me rreth 50% krahasuar me një vit më parë. Autoritetet vunë në dukje se më shumë vizitorë do të thotë më shumë njerëz të ekspozuar ndaj rrezikut dhe kërkuan që masat parandaluese të shoqërohen me informim në kohë, sinjalistikë, kapacitete të shtuara të emergjencave dhe bashkëpunim të drejtpërdrejtë ndërkufitar.
Pas tragjedisë, apeli i institucioneve ishte për më shumë koordinim dhe përgjegjësi, me qëllim që ujërat e Drinit të Zi të mos kthehen sërish në burim rreziku për banorët dhe turistët.
