Konfindustria i kërkon qeverisë ndërhyrje të menjëhershme për frenimin e rritjes së çmimeve të karburanteve, duke e konsideruar shtrenjtimin e ditëve të fundit të papranueshëm dhe pa arsye. Sipas njoftimit të saj, çmimet e naftës në Shqipëri janë ndjeshëm më të larta se në vendet e rajonit dhe në shumë shtete të BE-së, duke rritur kostot për qytetarët, bizneset dhe prodhimin vendor. Në përgjigje të rritjes së fortë të çmimeve në dhjetëditëshin e fundit të korrikut e në vazhdim, Konfindustria kërkon ndërhyrje rregullatore në katër drejtime.
E para, propozohet ulja me të paktën 15% e barrës së taksave mbi karburantet, që sipas saj duhet të sjellë të paktën ulje prej 20 lekë/litër në çmimet me pakicë. Si argument, organizata përmend se Italia dhe Gjermania kanë zbatuar ulje taksash në nivele 15–20% me efekt të drejtpërdrejtë në treg.
E dyta, kërkohet ringritja e Bordit të Transparencës për të siguruar që ulja e mundshme e taksave të transmetohet e plotë te qytetarët dhe bizneset, dhe jo të përfitojnë vetëm operatorët e karburanteve. Konfindustria vë në dukje se tregu i karburanteve në Shqipëri është një treg tipik monopol dhe oligopol i pastër.
E treta, ajo kërkon kontrolle të menjëhershme nga institucionet për cilësinë e karburanteve që qarkullojnë në treg. Ka të dhëna, thotë njoftimi, se sasi të mëdha të karburantit jashtë standardeve Euro 3 janë hedhur në treg, me pasoja të rënda për shëndetin, mjedisin, automjetet dhe buxhetin e shtetit.
E katërta, Konfindustria kërkon ndërhyrje të jashtëzakonshme të institucioneve shtetërore dhe SPAK për luftën kundër kontrabandës së karburanteve, që sipas saj shkakton dëm qindra milionësh Euro mbi buxhetin. Si shembull, njoftimi përmend goditjen e autoriteteve të Kosovës ndaj linjave kontrabandë tranzit nga Shqipëria, ku karburantet rezultuan të mbushura me ujë në doganë.
Në përfundim, njoftimi vëren se çmimet me pakicë në tregun vendor prej rreth 2,15–2,2 euro/litër janë shumë më të larta se në shtetet e rajonit dhe në disa vende të BE, duke sjellë goditje të forta për industritë, prodhimin vendor dhe qytetarët.
