Zyra e Komisionerit për të Drejtën e Informimit dhe Mbrojtjen e të Dhënave Personale ka nisur konsultimin publik për paketën e projektakteve nënligjore që do të mbështesin zbatimin e Ligjit nr. 12/2026 “Për Lobimin në Republikën e Shqipërisë”. Projektaktet, të hartuara me mbështetjen e ekspertëve të Këshillit të Evropës, përcaktojnë rregullat për funksionimin e Regjistrit të Lobimit dhe procedurat për administrimin, publikimin dhe verifikimin e të dhënave të regjistrit.
Paketë rregullash përfshin kërkesa dhe mekanizma për raportimin e veprimtarisë së lobimit, administrimin e dokumentacionit dhe verifikimin e informacionit të paraqitur nga lobistët dhe subjektet që ushtrojnë veprimtari lobuese. Ajo parashikon gjithashtu dispozita për menaxhimin e konfliktit të interesit dhe një Kod Sjelljeje për Lobistët, si dhe rregulla për aktivitetet informuese dhe ndërgjegjësuese në fushën e lobimit.
Në kuadër të procesit, projektaktet janë publikuar në faqen zyrtare të Zyrës së Komisionerit, në seksionin “Njoftimi dhe Konsultimi Publik”, dhe konsultimi do të qëndrojë i hapur deri më 4 shtator 2026. Institucionet publike, organizatat e shoqërisë civile, mediat, komuniteti i biznesit, ekspertët dhe çdo palë tjetër e interesuar mund të dërgojnë komente dhe sugjerime në adresën [email protected].
Kontributet e pranuara gjatë periudhës së konsultimit do të shqyrtohen nga Zyra e Komisionerit dhe, sipas rastit, do të pasqyrohen në versionin përfundimtar të akteve nënligjore para miratimit të tyre. Zyra ka vlerësuar bashkëpunimin dhe ndihmën e Këshillit të Evropës në hartimin e projektaktëve dhe ka ftuar të gjitha palët e interesuara që të kontribuojnë në procesin e konsultimit publik për të siguruar që rregullat zbatohen në përputhje me ligjin dhe synimet e parashikuara nga legjislacioni për lobimin.
