Një sistem i ri i autorizimit elektronik të udhëtimit (ETA) do të hyjë në fuqi më 25 shkurt për qytetarët e 85 vendeve, përfshirë SHBA-në dhe Australinë, të cilët deri tani udhëtonin pa vizë në Mbretërinë e Bashkuar. Qeveria britanike thekson se ky hap do ta bëjë sistemin e imigracionit më të sigurt dhe efikas, megjithatë, ndërrimi po shkakton vështirësi veçanërisht për ata me shtetësi të dyfishtë.
ETA është një leje dixhitale që lejon qëndrim deri në gjashtë muaj për turizëm, biznes apo studime të shkurtra dhe është e vlefshme për dy vjet ose deri në skadimin e pasaportës. Ajo mundëson udhëtime të shumta dhe përdoret nga ata që nuk kanë nevojë për vizë, ndërsa shtetasit britanikë dhe irlandezë janë të përjashtuar nga kërkesa.
Aplikimi për ETA bëhet përmes aplikacionit zyrtar në Google Play ose Apple App Store, me tarifë prej 16 paund, e cila pritet të rritet në 20 paund. Aplikuesit duhet të paraqesin të dhënat e pasaportës, një foto dhe të përgjigjen në disa pyetje sigurie. Linjat ajrore do të kontrollojnë nëse udhëtarët kanë një ETA të vlefshme përpara nisjes, por kjo nuk garanton hyrjen në Mbretërinë e Bashkuar, pasi kontrollet kufitare mbeten të detyrueshme.
Një problem i veçantë paraqitet për personat me shtetësi të dyfishtë britanike dhe një tjetër, të cilët nuk mund të aplikojnë për ETA. Ata duhet të përdorin një pasaportë britanike ose një certifikatë të së drejtës për të hyrë në vend. Shumë prej tyre, megjithatë, nuk kanë aplikuar kurrë për pasaportën britanike, pavarësisht se jetojnë aty për dekada. Procedura kërkon kohë dhe kosto, me një tarifë rreth 100 paund për pasaportë dhe 589 paund për certifikatën e së drejtës.
Deri tani, ata kanë udhëtuar pa pengesa me pasaportën e huaj. Tani, në mungesë të dokumentacionit britanik, ata rrezikojnë të mos lejohet hipja në avion ose hyrja në vend.
