Shërbimet e Komisariatit të Policisë Elbasan, në bashkëpunim me Sektorin e Qarkullimit Rrugor, kanë realizuar operacionin policor të koduar “Kamuflimi”. Operacioni u zhvillua pas informacioneve operative dhe rezultoi me arrestimin në flagrancë të E. E., një 32-vjeçar nga Peqini.
Ky individ u lokalizua në fshatin Bradashesh, ku drejtonte një automjet tip “Audi”. Ai kishte vendosur fenelina të ngjashme me ato të Policisë në pjesën e përparme të mjetit, me qëllim që të kamuflohej si punonjës zyrtar dhe të shmangte kontrollet e policisë.
Gjatë kontrollit të automjetit, policia gjeti një armë zjarri pistoletë me fishekë, e cila u sekuestrua si provë materiale përveç fenelinave dhe automjetit. Materialet e procedurës iu referuan Prokurorisë pranë Gjykatës së Shkallës së Parë të Juridiksionit të Përgjithshëm Elbasan për veprat penale “Mbajtja pa leje dhe prodhimi i armëve, armëve shpërthyese dhe i municionit” dhe “Mbajtja pa të drejtë e uniformës”.
Policia e Shtetit thekson angazhimin e saj për të parandaluar çdo tentativë që sfidon autoritetin e ligjit dhe për të garantuar sigurinë e qytetarëve.
