Maila Micheli, 29 vjeçe, rrëfen se u detyrua nga nëna e saj të hynte në prostitucion që në moshën 14-vjeçare. Ajo thotë se abuzimi nisi gradualisht dhe vazhdonte me takime të përsëritura, duke u përballur çdo javë me situata të rënda dhe të dhimbshme. “Kaloja çdo të hënë me një burrë më të madh në moshë. Ai më neveriste. Më rridhte gjak në dush duke u fërkuar, ishte e vetmja mënyrë që ndihesha më e pastër,” tregon Maila për përjetimet gjatë atyre takimeve.
Sipas dëshmisë së saj, nëna kishte ushtruar presion psikologjik ndaj saj që në fëmijëri, duke i treguar fotografi të papërshtatshme dhe duke e bindur për përfitimet ekonomike që, sipas nënës, sillte prostitucioni. Maila përmend momentet e dëshpërimit të thellë, duke thënë: “Isha e bindur se do t’i jepja fund jetës sime, nuk mund ta duroja më.”
Një episod i veçantë që Maila përshkruan është kur nëna e saj e detyroi të publikonte një njoftim në gazetë me një identitet të rremë, në të cilin ofrohej “shoqëri për të rritur.” Ajo thotë se tarifat për shërbimet ishin vendosur nga vetë nëna dhe shkonin 80, 100 dhe 200 euro, në varësi të kërkesave të klientëve. Kjo situatë i shkaktoi Mailës ndjenjë të thellë tradhtie dhe tronditjeje, pasi abuzuesi kryesor ishte personi që pritej ta mbronte: “Nuk e mendon kurrë që nëna jote do të të bëjë diçka të tillë,” shprehet ajo.
Maila tregon po ashtu se kishte tentuar të vetëvritej, por që u shpëtua nga qeni i saj, të cilin e përmend si shkak pse është ende gjallë: “Nëse jam këtu sot, është falë saj.” Rrëfimi i Mailës paraqet një dëshmi të dhimbshme për përdorimin e presionit familjar dhe për keqpërdorimin seksual të një personi të mitur, përmes manipulimit dhe shfrytëzimit ekonomik nga një anëtar i familjes.
