Sezoni i Romelu Lukakut me Napolin përfundoi. Pas përpjekjeve të vështira për të gjetur një zgjidhje në Castel Volturno me trajnerin Antonio Conte, sulmuesi u rikthye në Belgjikë për t’u përqendruar në rikuperim me synimin e pjesëmarrjes në Botërorin e këtij viti. Vendimi u mor në mënyrë konsensuale midis klubit, trajnerit dhe lojtarit, si zgjidhja më e mirë për gjendjen fizike të 33-vjeçarit.
Lukaku do të stërvitet në qendrën e kombëtares belge për të tentuar të rimarrë plotësisht nga një dëmtim i shkallës së lartë në kofshën e majtë, që e ka ndjekur prej gushtit 2025. Rehabilitimi i tij nuk ka qenë kurrë i plotë dhe kjo mbetet shqetësim për përgatitjet e Belgjikës për Botërorin në Amerikën e Veriut. Trajneri i përfaqësueses, Rudi Garcia, do të preferonte ta shihte të aktivizuar në fushë për të vlerësuar progresin, por për momentin do të mbështetet në përgjigjet konkrete nga programet e personalizuara të stërvitjes që sulmuesi do të ndjekë dhe që do t’i monitorojë nga afër.
Belgjika ka miqësoret ndaj Kroacisë dhe Tunizisë më 2 dhe 6 qershor, ndërsa debutimi në Botëror pritet më 15 qershor kundër Egjiptit. Me kalendarin e ngjeshur dhe gjendjen e dëmtimit, nuk është e sigurt nëse Lukaku do të udhëtojë me pjesën tjetër të skuadrës drejt Shteteve të Bashkuara.
Lukaku nuk do të kthehet në Napoli për dy ndeshjet e fundit të sezonit kundër Pisës dhe Udineses, takime kyçe për Conte dhe skuadrën në përpjekje për të siguruar kualifikimin në Ligën e Kampioneve. Ky vendim shihet si një sinjal që afrohet edhe ndarja e lojtarit nga Napoli pas një sezoni të trazuar, gjatë të cilit Lukaku nuk ishte i pranishëm për të kontribuar në titullin e katërt të Serie A të klubit.
