Roma dhe Interi përballen në një sfidë kyçe të fazës, me të dyja skuadrat që synojnë të qëndrojnë në krye të renditjes. Trajneri i Romës, Gian Piero Gasperini, e konsideron takimin të veçantë dhe thekson se skuadra do të duhet të tregojë karakter, edhe pse sezoni sapo ka nisur dhe është herët për të folur për titullin.
Gasperini përmendi atmosferën pozitive rreth ekipit, por paralajmëroi që entuziazmi të mos kthehet në presion. “Ekziston kënaqësia e mbërritjes në këtë ndeshje në këtë pozicion, por jemi vetëm në fillim. Është e gjitha energji pozitive që duhet shfrytëzuar. Pastaj, sigurisht, është vetë ndeshja; kur gjërat nuk shkojnë mirë, ka një anë negative, por duhet të përqendrohemi te loja,” tha ai gjatë konferencës për shtyp.
Trajneri shfaqi respekt për Interin, duke theksuar se skuadra zikaltër është një pikë reference në Serie A dhe Europë dhe ka bërë gjëra të jashtëzakonshme në vite. Ai shtoi se Roma dhe ekipet e tjera duhet të përpiqen të afrohen me nivelin e Interit dhe duhet të kenë qartësi e ndershmëri për të pranuar superioritetin e të tjerëve. Megjithatë, Gasperini u shpreh i kënaqur me punën e ekipit të tij dhe afirmoi synimin për t’u futur në bisedë në krye të tabelës, duke theksuar se është ende shumë herët për përfundime sezonale.
Trajneri vuri në dukje nevojën për t’u përgatitur edhe për momentet e vështira në ndeshje, duke mos pritur që çdo takim të zhvillohet në të njëjtën mënyrë. Ai përmendi se skuadra ka treguar vlera në situata të ndërlikuara, si kundër Atalantës dhe në Torino.
Sa i përket gjendjes së skuadrës, Gasperini dha sinjale pozitive: grupi është në dispozicion dhe Lorenzo Pellegrini është stërvitur rregullisht dhe është i disponueshëm. Disa lojtarë kanë pasur shqetësime të vogla fizike ose grip sezonale, por pritet që ekipi të jetë gati për sfidën. Në lidhje me rekordet personale ndaj Interit, trajneri pranoi se vitet e fundit rezultatet nuk kanë qenë në favorin e tij dhe se përballë do të jetë një ekip më i fortë se ai kundër të cilit kishte arritur më parë rezultate.
