David Beckham po synon të rikthejë sulmin e famshëm MSN te Inter Miami, duke tentuar të transferojë Neymarin për t’iu bashkuar Lionel Messit dhe Luis Suarezit. Lajmi mbi interesin e klubit nga Florida u rikthye pas deklaratave të ish-mesfushorit brazilian Felipe Melo, i cili tha se ka informacion nga burime pranë Santosit se Neymar do të transferohet te Inter Miami pas përfundimit të kontratës me klubin brazilian. Melo deklaroi se, sipas asaj që dinte ai, Neymar do të shkojë në Miami në janar, por theksoi se duhet pritur konfirmimi zyrtar.
E ardhmja e Neymar është diskutuar gjerësisht, pasi kontrata e tij me Santos skadon më 31 dhjetor. Emri i sulmuesit u përfol edhe për një kalim te Galatasaray, por deklaratat e Melos rindezën spekulimet se Inter Miami mund të jetë destinacioni i radhës. Nëse realizohet ky transferim, do të rikrijohej pata MSN që në periudhën 2014–2017 formoi një nga treshat më të frikshëm sulmues në historinë e futbollit, te Barcelona.
Nga viti 2014 deri në 2017, Messi, Suarez dhe Neymar fituan në total 9 trofe me Barcelonën, përfshirë një Ligë të Kampionëve, dy tituj në La Liga dhe një Botëror Klubesh. Nën drejtimin e Luis Enrique në sezonin e parë së bashku fituan tripletën, me treshen që shënoi 122 gola në të gjitha kompeticionet atë sezon: Messi 58, Neymar 39 dhe Suarez 25. Këto shifra janë rikujtuar si referencë për fuqinë sulmuese që mund të rikrijohet nëse bashkohen përsëri.
Aktualisht Messi dhe Suarez janë tashmë pjesë e Inter Miami, ndërsa ardhja e Neymarit do të konsolidonte sulmin dhe do të sillte përfitime të mëdha marketingu për klubin. Megjithatë, mbetet shqetësimi lidhur me gjendjen fizike të Neymarit, pas një periudhe me dëmtime të njëpasnjëshme. Për momentin nuk ekziston asnjë marrëveshje zyrtare mes Neymar dhe Inter Miami, dhe sulmuesi ende nuk ka marrë një vendim për hapin e ardhshëm në karrierën e tij.
