TIRANA- Ministri i Brendshëm, Ervin Hoxha paralajmëroi deputetët e PD-së pas revoltës së djeshme në Parlament se ngjarja do referohet në SPAK. Hoxha thotë se flakët në dyert e Kuvendit janë akt që përdhos ndjenjat e qytetarëve të këtij vendi.
Ai shton se në Parlament nuk vihet me shishe benzine, por për të ushtruar lirinë e të drejtës së fjalës mbi bazën e mandatit që merr nga zgjedhësit.
Gjithashtu Hoxha ka shtuar se Policia e Shtetit dhe Garda e Republikës kanë kryer menjëherë të gjitha veprimet procedurale, duke administruar pamjet filmike dhe çdo element tjetër me interes për hetimin.
Reagimi i ministrit të Brendshëm Ervin Hoxha:
Flakët e zjarrit, pasditen e djeshme, në dyert e Kuvendit të Shqipërisë, që është tempulli më i lartë i një sistemi demokratik, janë akt që përdhos ndjenjat e qytetarëve të këtij vendi. Kuvendi mbetet thelbi i shprehjes së vullnetit dhe besimit të votuesve, ndaj çdo akt vandalizmi brenda apo në dyert e tij, është absolutisht i papranueshëm dhe i ndëshkueshëm ligjërisht.
Pengimi i ushtrimit të funksioneve kushtetuese,
Heqja me dhunë e të drejtës së fjalës,
Goditja për shkak të detyrës,
Rrezikimi i jetës së deputetëve duke goditur me mjete të forta,
Shkatërrimi me zjarr i pronës publik, ishin akte të rënda dhune dhe vandalizmi.
Në Parlament nuk vihet me shishe benzine, por për të ushtruar lirinë e të drejtës së fjalës mbi bazën e mandatit që merr nga zgjedhësit. Zjarrvënia, por dhe aktet e tjera të dhunës gjatë seancës parlamentare, ishin vendngjarje për organet ligjzbatuese. Policia e Shtetit dhe Garda e Republikës kanë kryer menjëherë të gjitha veprimet procedurale, duke administruar pamjet filmike dhe çdo element tjetër me interes për hetimin. Ngjarja do të referohet në përfundim të këtyre veprimeve, në Prokurorinë e Posaçme (SPAK), për shkak të cilësive të veçanta, që kanë deputetët.
