Bursat europiane nisën javën me një rënie të dukshme, duke vazhduar trendin negativ pas njoftimit të Presidentit amerikan Donald Trump për vendosjen e tarifave doganore ndaj Groenlandës. Trump kumtoi se, nga 1 shkurti, vendet si Danimarka, Norvegjia, Suedia, Franca, Gjermania, Britania e Madhe, Holanda dhe Finlanda, të cilat kanë dërguar trupa në ishull, do të përballen me tarifa doganore prej 10%.
Ky zhvillim ka shtuar shqetësimin në Europë, ku tani po shqyrtohet mundësia e pezullimit të marrëveshjes së vitit të kaluar me Uashingtonin, e cila ende nuk është ratifikuar nga Parlamentin Evropian. Kërcënimi për një luftë të re tregtare me SHBA-në po krijon nervozizëm në tregjet financiare. Presidenti francez Emmanuel Macron, që është angazhuar për të koordinuar një përgjigje europiane ndaj tarifave amerikane, ka kërkuar aktivizimin e Instrumentit të Bashkimit Evropian Kundër Presioneve, duke e cilësuar kërcënimin e Trumpit si “të papranueshëm”.
Këto tensione ndodhin në një moment ku Forumi Ekonomik Botëror po zhvillohet në Davos, dhe bursa e Parisit u hap me një rënie prej 1.5%. Rëniet vazhduan gjithashtu në Frankfurti (-1,4%), Madridi (-0,9%) dhe Londra (-0,6%). Sektorët më të prekur nga kjo situatë janë ata të automobilave, mallrave të luksit dhe teknologjisë.
Ekspertët vërejnë se investitorët po orientohen drejt aseteve më të sigurta, si metalet e çmuara, me arin dhe argjendin që arritën nivele të reja maksimale pas një hovi të fortë javën e kaluar. Të dhënat tregojnë se nervozizmi në tregje lidhet drejtpërdrejt me pasigurinë rreth politikave tregtare të SHBA-së dhe ndikimin e mundshëm në ekonominë globale.
