Për të tretën herë, qytetarë të Patosit u mblodhën në protestë duke kundërshtuar propozimin për shkrirjen e Bashkisë Patos dhe bashkimin e saj me Bashkinë Fier. Protestuesit shprehen kundër ndryshimit të statusit të qytetit dhe kërkojnë që Patosi të vijojë të funksionojë si njësi e veçantë administrative.
Sipas pjesëmarrësve në protesta, Patosi plotëson kriteret për të qenë bashki, ndërsa një nga argumentet kryesore që paraqesin lidhet me të ardhurat e gjeneruara nga industria e naftës, e cila prej dekadash është një nga aktivitetet kryesore ekonomike të zonës. Ata theksojnë se këto të ardhura, si dhe historia dhe struktura ekonomike lokale, e bëjnë të padrejtë ndërhyrjen që do të ndryshonte statusin administrativ të qytetit.
Një shqetësim i përsëritur nga protestuesit është largimi i shërbimeve administrative nga Patosi. Sipas tyre, bashkimi me Fierin do të detyronte qytetarët të udhëtonin drejt Fierit për dokumente dhe shërbime që aktualisht mund t’i marrin në Patos. Ky problem konsiderohet veçanërisht i rëndë për të moshuarit, të cilët, sipas banorëve, do të hasnin vështirësi praktike dhe ekonomike për t’u paraqitur në institucionet e largëta. “Patosi ka historinë, ekonominë dhe të ardhurat e veta. Nuk është e drejtë që qytetarët të detyrohen të shkojnë në Fier për shërbime që sot i marrin këtu. Sidomos për të moshuarit kjo është një vështirësi e madhe”, u shpreh një qytetar.
Protestuesit paralajmërojnë se do të vazhdojnë kundërshtimin edhe në ditët në vijim dhe kërkojnë që zëri i qytetarëve të Patosit të merret në konsideratë para çdo vendimmarrjeje për riorganizimin territorial. Ata kërkojnë që autoritetet të konsiderojnë kriteret që, sipas tyre, e bëjnë Patosin të denjë për të mbajtur statusin e vet si njësi administrative e pavarur.
