Kryeministri Edi Rama prezantoi reformën e re të administratës publike “Shkalla e Meritës”, duke shpjeguar funksionimin dhe ndryshimet që synon t’i sjellë sistemit shtetëror. Ai theksoi tre shtyllat kryesore të reformës: hyrjen në administratë përmes testimit kombëtar, përparimin në karrierë bazuar në meritë dhe përgjegjshmërinë në drejtimin e institucioneve. Rama përmendi gjithashtu procesin e vlerësimit të drejtuesve dhe dorëheqjet e disa prej tyre pak ditë më parë.
Kreu i qeverisë nënvizoi se reforma synon të ndikojë mënyrën se si menaxhohet dhe vlerësohet kapitali njerëzor i administratës. Ai shprehu shqetësim për nivelin e përgatitjes dhe disiplinës që kërkon një proces i tillë, por theksoi se Brukseli dhe partnerët europianë konfirmojnë se administrata ka persona të përgatitur dhe të përkushtuar, të cilët duhet të njihen dhe vlerësohen me kujdes më të madh. Rama solli shembullin e nëpunësve që punojnë me përkushtim gjatë viteve, por nuk rriten në karrierë sepse drejtuesit nuk çmojnë vlerën e tyre, gjë që ai e quajti të padrejtë dhe demotivuese për shërbimin ndaj qytetarëve.
Rama theksoi se paga më e mirë dhe kushtet e punës nuk zgjidhin problemin themelor të mungesës së meritokracisë, ndaj ndryshimi duhet të bëhet sistematikisht dhe jo në dorë të çdo drejtuesi. Për hyrjen në administratë, reforma parashikon testim kombëtar për verifikim të njohurive, i zhvilluar në bashkëpunim me Qendrën e Shërbimeve Arsimore, e cila po adopton modelin e provimeve të Kembrixhit. Kandidatët që kalojnë testin pajisen me certifikatë e vlefshme për katër vite dhe vazhdojnë konkurrimin.
Përparimi në karrierë do të nxisë jo vetëm kërkesën ndaj nëpunësve për meritë, por edhe garancinë që shteti e njeh atë. Sa i përket drejtuesve, Rama kujtoi se dhjetë ditë më parë qindra drejtues iu nënshtruan një procesi vlerësimi të rezultateve në punë. Ai pohoi se procesi nuk synon të ndryshojë emra thjesht për ndryshim, por të identifikojë ku ka dështime dhe rezultate të dobëta; në vende ku problemet përsëriten duhet të ketë pasoja, pa cenuar kapacitetet dhe procesin e negociatave me BE-në.
