Transporti urban dhe ndërqytetas do të rikthehet në normalitet pas një marrëveshjeje mes Shoqatës së Transportit dhe përfaqësuesve të qeverisë dhe pushtetit lokal. Pas një takimi me ministren e Ekonomisë, ministrin e Infrastrukturës dhe kryetaren e bashkisë, është arritur një dakordësi për vijimin normal të shërbimit. Gjatë diskutimeve, është folur edhe për mundësinë e një subvencioni për litër karburant, por vlera e tij ende nuk është përcaktuar.
Përfaqësuesit e shoqatës njoftuan se nga sot do të vazhdojë transporti me kapacitet të plotë, duke theksuar se operatorët janë të gatshëm të ofrojnë shërbimin siç duhet, pas situatës së krijuar këto dy ditë. Gjithashtu, është planifikuar një takim tjetër javën e ardhshme për të diskutuar kërkesat e tjera ekonomike, përfshirë çështjet si TVSH, akciza dhe kategoritë që udhëtojnë falas.
