Pothuajse gjysmë milioni njerëz vlerësohet se vdesin çdo vit nga shkaqe që lidhen me nxehtësinë ekstreme. Zjarret shkatërruese në Greqi dhe në shumë rajone të botës, së bashku me valët e të nxehtit, thatësirat, mungesat e ujit dhe reshjet ekstreme, nuk janë fenomene të izoluara, por pjesë e një realiteti të ri klimatik ku ndryshimet klimatike luajnë një rol kryesor, thotë Eleni Myrivili, Drejtore Globale për Nxehtësinë në Programin e Kombeve të Bashkuara për Mjedisin (UNEP).
Myrivili shprehet se nxehtësia ekstreme ndodh më shpesh, zgjat më shumë dhe shfaqet më herët gjatë vitit. Temperaturat e larta po ndikojnë në çdo sistem kritik: furnizimin me ujë, bujqësinë, energjinë, infrastrukturën dhe ekonominë. Rreth 2.4 miliardë punëtorë, ose më shumë se 70% e fuqisë punëtore globale, ekspozohen çdo vit ndaj nxehtësisë ekstreme, duke rrezikuar shëndetin e tyre. Ndërkohë, ndryshimet klimatike kanë ulur tashmë prodhimin bujqësor global me rreth 20% krahasuar me vitet 1960.
Myrivili, e cila mori detyrën në OKB në mars 2023, thekson nevojën për masa konkrete përshtatjeje. Ajo kërkon qytete me më shumë gjelbërim dhe hije, ndërtesa që qëndrojnë të freskëta dhe një dizajn urban të përshtatur ndaj ndryshimeve klimatike, që sipas saj nuk janë më luks por infrastrukturë thelbësore. Financimi për përshtatjen mbetet shumë poshtë nevojave, dhe pjesa më e madhe e investimeve duhet të shkojë drejt parandalimit.
Zjarret e mëdha nuk janë problem vetëm për Greqinë dhe rajonin e Mesdheut; fenomene të tilla po shfaqen edhe në rajone si Siberia dhe Kanadaja. Myrivili vëren se shpesh zjarret trajtohen si fenomenet e izoluara dhe insiston se më shumë shpenzime duhet të shkojnë për parandalimin.
Si përgjigje ndaj riskut të së nxehtit ekstrem, qyteti i Parisit zhvilloi një simulim për një skenar me temperatura deri në 50°C. Kjo metodologji pritet të përdoret edhe në rreth 20 qytete të tjera përfshirë Athinën, Nju Jorkun, Londrën, Barcelonën dhe Melburnin. Myrivili shpreh shqetësim se masat aktuale janë të vogla në krahasim me shpejtësinë e zhvillimit të këtyre fenomeneve.
