Një transferim i mundshëm i Yan Diomandé te Real Madridi po rrezikon planet e merkatos së Barcelonës, duke vënë në dyshim aftësinë e katalanasve për të siguruar Fisnik Asllanin, një nga objektivat e tyre kryesorë në sulm. Sipas të përditshmes spanjolle AS, RB Leipzig e ka identifikuar sulmuesin kosovar të Hoffenheimit si zëvendësuesin ideal të Diomandé, në rast të marrëveshjes me “Santiago Bernabéu”.
Raportohet se negociatat mes Real Madridit dhe Leipzigut për Diomandé po avancojnë me ritme të shpejta. Në këtë kuadër, klubi gjerman thuhet se është i gatshëm të aktivizojë menjëherë klauzolën e lirimit të Asllanit, e cila kap vlerën e 29 milionë eurove, për të siguruar menjëherë pasuesin e mundshëm nëse mbrojtësi largohet drejt Spanjës.
Situata do të komplikonte përpjekjet e Barcelonës, që e sheh 23-vjeçarin si pasuesin e përshtatshëm të Ferran Torres, teksa e ardhmja e sulmuesit spanjoll në “Camp Nou” mbetet e paqartë. Kontrata e Torres skadon pas një viti, ndërsa interesimi i Paris Saint-Germain dhe Atlético Madrid ka shtuar dyshimet mbi vazhdimësinë e tij te Barcelona. Për shkak të kësaj, drejtuesit blaugrana nuk mund të kryejnë një lëvizje zyrtare për Asllanin pa sqaruar situtën e Torres.
Nga ana e vet, Asllani thuhet se i ka dhënë miratimin paraprak një transferimi te Leipzig, por nuk ka marrë ende vendim përfundimtar, pasi pret një ofertë zyrtare nga Barcelona. Sulmuesi zhvilloi një sezon të shkëlqyer me Hoffenheimin, duke shënuar 11 gola dhe dhënë 8 asistime në 35 ndeshje, performancë që ka tërhequr vëmendjen e disa klubeve të mëdha evropiane.
Megjithatë, koha po punon në favor të Leipzigut: klubi gjerman dëshiron të mbyllë sa më shpejt marrëveshjen me Asllanin përpara se të finalizojë largimin e Diomandé drejt Real Madridit. Situata mbetet dinamike dhe varet nga finalizimi i bisedimeve midis klubeve dhe vendimet e lojtarëve.
