Real Madrid publikoi një deklaratë zyrtare pas vendimit të FIFA-s për të hequr dorë nga propozimi për shitjen e pjesshme të të drejtave tregtare të kompeticioneve të saj, përfshirë Kupën e Botës për burra dhe gra. Klubi e vlerësoi pozitivisht këtë vendim, duke e cilësuar si lajm të mirë për futbollin, institucionet e tij dhe për miliona tifozë. Në deklaratë, Real Madrid shprehu mirënjohje ndaj UEFA-s, konfederatave dhe federatave, si dhe ndaj institucioneve të tjera që kundërshtuan projektin, duke theksuar se bashkimi dhe ndjenja e detyrës e mbrojtën futbollin në një moment vendimtar.
Propozimi i presidentit të FIFA-s, Gianni Infantino, parashikonte krijimin e një kompanie të quajtur FIFA Forward Enterprise (FFE), e cila do të mbikëqyrte aspektet tregtare dhe operacionale të kompeticioneve të FIFA-s. Elementi më i diskutueshëm ishte mundësia e shitjes së një pjesëje prej 20% të aksioneve të kësaj kompanie tek investitorë privatë.
Plani shkaktoi një revoltë të gjerë në botën e futbollit. UEFA paralajmëroi se do të bojkotonte kompeticionet e FIFA-s derisa ideja të hidhej poshtë dhe deklaroi se Infantino kishte “humbur besimin” e organit qeverisës të futbollit evropian. Përveç UEFA-s, edhe CONCACAF dhe Konfederata Aziatike e Futbollit (AFC) shprehën kundërshtimin e tyre ndaj propozimit.
Për shkak të kundërshtimit nga këto tri konfederata, FIFA vendosi të braktisë propozimin, një dështim i konsideruar i rëndësishëm për presidentin Infantino. Si pasojë, UEFA po shqyrton hapa të mëtejshëm, përfshirë mundësinë e një vote mosbesimi ndaj zyrtarit zviceran, e cila do të kërkonte mbështetjen e 43 federatave anëtare të FIFA-s.
Real Madrid ishte klubi i parë i madh që u shpreh publikisht kundër planit të Infantinos, dhe në deklaratë vuri në dukje rolin e institucioneve që kundërshtuan projektin me vendosmëri dhe përgjegjësi. Lajmi u raportua nga Top Channel.
