Florentino Perez njoftoi pasditen e së martës mbajtjen e zgjedhjeve të parakohshme për president të Realit të Madridit duke rivendosur kandidaturën e tij. Statutet e klubit përcaktojnë qartë kriteret që duhet të plotësojnë kandidatët, sipas të përditshmes spanjolle Marca.
Kriteret për të qenë president i Realit të Madridit janë të përcaktuara në statut dhe përfshijnë kërkesa të shumta administrative, ligjore dhe financiare. Së pari, kandidati duhet të jetë shtetas spanjoll. Duhet të jetë i moshës madhore dhe me aftësi të plota pune, si dhe të jetë i përditësuar me përmbushjen e detyrimeve sociale. Një kërkesë tjetër është anëtarësia e klubit për një periudhë të gjatë: të paktën 20 vjet pa ndërprerje për presidentin, 15 vjet për zëvendëspresidentin dhe 10 vjet për postet e tjera. Kandidati gjithashtu nuk duhet të jetë subjekt i sanksioneve që e ndalojnë nga marrja e detyrave drejtuese.
Statuti ndalon gjithashtu që kandidati të mbajë rol drejtues në klube të tjera të futbollit dhe të jetë aktiv në funksione sportive në kohën e shpalljes së kandidaturës, përfshirë si futbollist, arbitër, trajner apo teknik te klube të tjera. Një kërkesë thelbësore financiare është paraqitja e një garancie bankare të lëshuar nga një ent i regjistruar në Bankën e Spanjës, me vlerë minimale të barabartë me 15% të buxhetit të shpenzimeve të klubit. Kjo garanci paraprake do të shndërrohej automatikisht në garanci përfundimtare në rast të zgjedhjes së kandidatit. Ndër të tjera, garancia duhet të lëshohet mbi pasurinë personale të kandidatëve dhe të mbështetet vetëm nga kjo pasuri.
Këto kritere, të cilat Marca i përmend si shumë të rrepta, mund të plotësohen nga vetëm disa persona, duke vështirësuar pjesëmarrjen në garë të kandidatëve që mund të kishin opsione reale për postin e presidentit të klubit.
