Raportuesi i Parlamentit Evropian për Serbinë, Tonino Picula, ka kritikuar qëndrimin e Komisionit Evropian ndaj presidentit serb, Aleksandar Vuçiç, duke e cilësuar atë “padrejtësisht të butë”. Ai shprehu shqetësim se shtyrja e zgjidhjes politike për gjendjen aktuale në Serbi rrit rrezikun e përplasjeve serioze. Sipas Piculës, qëndrimi i Brukselit ka injoruar shenjat e qarta të autokracisë në Serbi, si korrupsioni dhe dobësimi i institucioneve demokratike.
Ai përdori shembuj të mbështetjes që Vuçiç ka pasur nga figura të njohura evropiane, si ish-kancelarja gjermane Angela Merkel, duke theksuar se ky qëndrim duket se po ndryshon. Picula pret që në raportin e ardhshëm të Komisionit Evropian për gjithë vendet kandidate, Brukseli të jetë më i prerë në vlerësimin e situatës në Serbi.
Në raportin e fundit, Komisioni Evropian theksoi se Serbia vazhdon të mbetet pas në politikën e jashtme, përfshirë mosvendosjen e sanksioneve ndaj Rusisë pas pushtimit të Ukrainës. Gjithashtu, u nënvizua rritja e polarizimit në vend për shkak të protestave masive që kanë zgjasur për një vit.
Parlamenti Evropian miratoi një rezolutë mbi polarizimin dhe represionin në Serbi, duke mbështetur të drejtën e protestave paqësore dhe duke dënuar dhunën e ushtruar nën patronazhin e shtetit. Rezoluta thekson se udhëheqësia serbe është përgjegjëse për rritjen e represionit dhe dobësimin e institucioneve demokratike.
Picula theksoi se reagimi ndaj protestave po bëhet gjithnjë e më shumë përmes dhunës dhe represionit, duke e cilësuar këtë si një fazë të revoltës qytetare. Ai shprehu frikën nga mundësia e ndonjë tragjedie si pasojë e tensioneve në vend. Në lidhje me kërkesat e studentëve për zgjedhje të parakohshme, ai e vuri në dyshim mundësinë që ato të jenë të lira dhe të ndershme, duke theksuar se autoritetet serbe nuk kanë përmbushur rekomandimet e vëzhguesve ndërkombëtarë.
Kohët e fundit, Vuçiç njoftoi se do të mbahen zgjedhje parlamentare përpara afatit, por nuk dha detaje të mëtejshme.
