Është publikuar Raporti i Gjendjes së Mjedisit 2025 i Agjencisë Kombëtare të Mjedisit. Për Tiranën, monitorimi i cilësisë së ajrit u krye në dy stacione kryesore: “Tirana Higjena” dhe “Tirana Mobile”. Grimcat PM10 në “Tirana Higjena” arritën 57.66 μg/m³, një tejkalim prej 44% të normës vjetore, me 33 ditë mbi normën ditore (nga 35 ditë të lejuara). Ndotja nga PM10 lidhet kryesisht me trafikun dhe tregoi përkeqësim krahasuar me vitet 2023–2024. Të dy stacionet regjistruan tejkalime të normës 8-orëshe të ozonit: “Tirana Higjena” 125.5 μg/m³ më 19.08.2025 dhe “Tirana Mobile” 133.8 μg/m³ më 15.08.2025, megjithatë niveli i ozonit përmirësohet krahasuar me periudhën 2023–2024. Dioksidi i azotit (NO2) shfaqi tejkalime ose vlera pranë kufirit në “Tirana Higjena”, por cilësia për këtë parametër përmirësohet në 2025 në krahasim me 2023–2024. Monoksidi i karbonit (CO) tregoi përmirësim në “Tirana Mobile” krahasuar me vitet 2023–2024, ndërsa “Tirana Higjena” shënoi përkeqësim krahasuar me 2024. Dioksidi i squfurit (SO2) rezultoi i mirë në “Tirana Higjena”, kurse stacioni “Tirana Mobile” kishte nivelet më të larta në vitet 2019 dhe 2025. Për benzën, për periudhën korrik–dhjetor 2025 nuk u regjistrua tejkalim vjetor në “Tirana Higjena”, megjithëse vlerat janë përkeqësuar krahasuar me vitet e mëparshme.
Në Tiranë u monitoruan edhe nivelet e zhurmës në 15 stacione; Tirana shkëputet si qyteti me zhurmën më të lartë. Norma e OBSH-së u tejkalua si gjatë ditës, ashtu edhe gjatë natës në të gjitha pikat. Mesatarja e qytetit: ditën 63.07 dB(A), natën 53.05 dB(A). Pika më e zhurmshme ishte “Farmacia 10” (ditë 64.73 dB(A), tejkalim 17.69%; natë 56.23 dB(A), tejkalim 24.9%). Niveli më i ulët gjatë ditës: “Stadiumi Dinamo” 61.66 dB(A) (tejkalim 12.1%). Gjatë natës, nivelet më të ulëta: “Selvia” dhe “Pallati i Kongreseve” 50.1 dB(A) (tejkalim 11.3%). Pikat e monitorimit përfshijnë Shkolla e Bashkuar, Rruga e Elbasanit, Kryqëzimi “Vasil Shanto”, Farmacia 10, Stacioni i Trenit, Kryqëzimi 21 Dhjetori, Pallati i Kongreseve, Ish-Blloku, Skënderbeu, Selvia, Lapraka, Drejtoria e Policisë, Shkolla “Edit Durham” dhe Stadiumi Dinamo.
Për Elbasanin, PM10 gjatë korrik–dhjetor 2025 arriti 59.72 μg/m³ (tejkalim 49% të normës vjetore), me përkeqësim krahasuar me vitet 2020 dhe 2023; shkaku kryesor vlerësohet trafiku rrugor pranë stacionit. PM2.5 nuk u monitorua në 2025; në 2024 stacioni i Elbasanit ishte i vetmi me tejkalim për PM2.5. NO2 shënoi tejkalim vjetor në gjysmën e dytë të vitit me 40.18 μg/m³ dhe përkeqësim krahasuar me 2019–2024. SO2 dhe O3 nuk regjistruan tejkalime; O3 përmirësohet krahasuar me 2023–2024. CO nuk shfaqi tejkalime, por tendenca është përkeqësuese krahasuar me 2024. Benzeni nuk kaloi normën vjetore, por vlerat tregojnë përkeqësim krahasuar me vitet e mëparshme. Raporti përmend gjithashtu aktivitetin e rafinerisë “RBH Beline” sh.a. në Elbasan gjatë 2025.
